კომენტარი

მქონდა დანაზოგი და შევწირე - ფატი ხალვაში

საპარლამენტო ფრაქცია „ქართული ოცნების“ წევრი ფატი ხალვაში გამოეხმაურა არასამთავრობო ორგანიზაცია „საერთაშორისო გამჭვირვალობა-საქართველოს“ ანგარიშს, რომლის მიხედვით ის იმ საჯარო მოხელეთა რიცხვში შედის, რომელთა შემოწირულობა პარტიის წინასაარჩევნო კამპანიაში მათ წლიურ შემოსავალს აღემატება.

ხალვაშის თქმით, მას დანაზოგი ჰქონდა, რომელიც შემოწირულობის სახით „ქართულ ოცნებას“ გადაურიცხა. მისი განმარტებით შვილებიც მუშაობენ, რაც ასევე დამატებითი შემოსავალია.

„მანდ საეჭვო და გასაკვირი არაფერია. ვარ პარტიის წევრი, მაქვს შემოსავალი და რამდენიც მინდა და როგორც მინდა, ვწირავ. მითუმეტეს, მაჟორიტარი დეპუტატობის კანდიდატი ვიყავი და მონაწილეობას ვღებულობდი. მქონდა დანაზოგი და შევწირე. შვილები მუშობენ. განსაკუთრებული ხარჯები არ მაქვს. წინა წლებიდანაც მქონდა დანაზოგი. მე არ განვიცდი თანხისა და შემოსავლების ნაკლებობას. მქონდა გარკვეული დანაზოგი, მქონდა სურვილი და შევწირე“, - თქვა ხალვაშმა.

შეგახსენებთ, რომ არასამთავრობო ორგანიზაცია „საერთაშორისო გამჭვირვალობა- საქართველომ“ 2016 წლის საპარლამენტო არჩევნების საარჩევნო კამპანიის დაფინანსების შესახებ ანგარიში წარადგინა.

დოკუმენტის ცალკე ქვეთავი ეხება საჯარო მოხელეებისა და მათი ოჯახის წევრების მიერ გაცემულ შემოწირულობებს.

გამოქვეყნებული ანგარიშის თანახმად, 2016 წელს ხალვაშის შემოსავალი 57 610 ლარს შეადგენდა. წლის განმავლობაში მან 7 920 აშშ დოლარი დახარჯა 40 000 აშშ დოლარიანი იპოთეკური სესხის მომსახურებისთვის, რომლის გამო მისმა წლიურმა წმინდა შემოსავალმა 39 632 ლარი შეადგინა.

„საერთაშორისო გამჭვირვალობა-საქართველოს“ მონაცემებით, უმრავლესობის წევრმა „ქართული ოცნების“ საარჩევნო კამპანიისთვის 20 000 ლარი გამოჰყო, რაც მისი წმინდა შემოსავლის 50%-ზე მეტია.

ორგანიზაციამ აღნიშნული მონაცემები პარტიების მიერ შევსებული დეკლარაციების, ცესკოსა და მარეგულირებელი კომისიის მონაცემების მიხედვით წარმოადგინა.

ანა მებურიშვილი