მსოფლიო

მოსკოვის მიერ `პერსონა ნონ-გრატად` გამოცხადებული ბრიტანელი დიპლომატების რაოდენობა გაზარდა

სერგეი ლავროვის უწყება რუსეთიდან დამატებით კიდევ 27 დიპლომატს აძევებს. ამის შესახებ ინფორმაცია BBC-მ გაავრცელა.

დიპლომატიური მისიის შესამცირებლად მოსკოვმა ლონდონს ერთთვიანი ვადა მისცა. დღეიდან სანქტ-პეტერბურგში ამერიკის გენერალურმა საკონსულომაც შეწყვიტა მუშაობა.

რუსეთის საგარეო საქმეთა სამინისტრომ საკონსულოს დახურვის შესახებ გადაწყვეტილება მას შემდეგ მიიღო, რაც ვაშინგტონმა 60 რუსი დიპლომატის გაძევებასთან ერთად, სიეტლში მოქმედი რუსეთის საკონსულო დახურა. რუსმა დიპლომატებმა საკონსულო დღის ბოლომდე უნდა დაცალონ და შემდგომ ქვეყანაც დატოვონ.

30 მარტს, რუსეთში დიპლომატიური მისიის შემცირების, ასევე საელჩოსა და საკონსულოების თანამშრომლების რაოდენობის დიდ ბრიტანეთში რუსული დიპლომატიური მისიის წევრთა რაოდენობასთან გასათანაბრებლად მოსკოვმა ლონდონს ერთთვიანი ვადა მისცა.

ყოფილი რუსი აგენტი სერგეი სკრიპალი და მისი შვილი 4 მარტს ინგლისის ქალაქ სოლსბერიში მოწამლეს. მომხდარზე პასუხისმგებლობა დიდმა ბრიტანეთმა რუსეთს დააკისრა.

14 მარტს ბრიტანეთის პრემიერ-მინისტრმა, პარლამენტში სიტყვით გამოსვლისას, ბრიტანეთიდან 23 რუსი დიპლომატის გაძევების შესახებ განაცხადა.

რუსი დიპლომატები 30-მდე სახელმწიფომ გააძევა, მათ შორის საქართველომაც.

ცირა გურგენიძე