კომენტარი

მომავალი წლის დასაწყისიდან საქართველოს მოქალაქეებს ევროკავშირში უვიზო მგზავრობის შესაძლებლობა ექნება- ვიქტორ დოლიძე

ევროპულ და ევროატლანტიკურ სტრუქტურებში ინტეგრაციის სახელმწიფო მინისტრი ვიქტორ დოლიძე იმედოვნებს, რომ საქართველოს მოქალაქეებს შენგენისა და ევროკავშირში უვიზოდ მგზავრობა, უკვე მომავალი წლის დასაწყისიდან შეეძლებათ.

ამის შესახებ დოლიძემ ევროსაბჭოსა და ევროპარლამენტის მიერ შეჩერების მექანიზმზე მიღწეული შეთანხმების კომენტირებისას განაცხადა.

მისი თქმით, ამიერიდან, უვიზო რეჟიმის მიღებისთვის ძალიან ცოტა პროცედურა რჩება.

„დღეს გრძელდება ევროპარლამენტში, ლიბეს კომიტეტში განხილვები და მე იმედი მაქვს, რომ მომავალ კვირას მიღწეულ შეთანხმებაზე კენჭისყრაც გაიმართება, ეს საუკეთესო ვარიანტი იქნება“,-აღნიშნა მინისტრმა.

ვიქტორ დოლიძემ განმარტა, რომ მომავალ კვირას კენჭისყრა არა მარტო შეჩერების მექანიზმზე, არამედ უკრაინისთვის და საქართველოსთვის უვიზო მიმოსვლის რეჟიმის დაწესებაზეც გაიმართება.

„ეს არის პარალელური რეჟიმი. გადაწყვეტილების მიღება და შეჩერების მექანიზმთან დაკავშირებული გადაწყეტილების მიღება. შემდგომ უკვე არის დარჩენილი ის, რომ ამოქმედების ვადები განისაზღვროს. მე მგონი არ დასჭირდება ამას დიდი ხანი და როგორც ვვარაუდობდით, ჩვენ მომავალი წლის დასაწყისიდან საქართველოს მოქალაქეებს უკვე ექნებათ საშუალება, რომ უვიზოდ იმოგზაურონ ევროკავშირისა და შენგენის ზონაში“,-განაცხადა დოლიძემ.

მონიკა დავლიანიძე