მსოფლიო

მოლდოვას პრემიერმა რუსი დიპლომატების გაძევების მიზეზი განმარტა

მოლდოვას პრემიერ-მინისტრის, პაველ ფილიპის, განცხადებით,ქვეყნიდან ხუთი რუსი დიპლომატის გაძევება, სპეცსამსახურებისგან მიღებული ინფორმაციის საფუძველზე მოხდა.

ამის შესახებ გამოცემა Publika წერს.

„ისინი პერსონა ნონ გრატად იმ ინფორმაციის საფუძველზე გამოცხადდნენ,რომელიც სპეცსამსახურებისგან მივიღეთ. ამაზე მეტის თქმა, ამ მომენტისთვის, არ შემიძლია. არ შემიძლია გაგიმხილოთ ყველა მიზეზი, რომელიც სპეცსამსახურებმა წარადგინეს“,-განაცხადა ფილიპმა.

მისივე თქმით, მას არც დიპლომატების სახელების და გვარების გამხელა შეუძლია.

გუშინ, მოლდოვას საგარეო საქმეთა სამინისტრომ, ხუთ რუს დიპლომატს უწყება გაუგზავნა, რომ მათ 24 საათის განმავლობაში რესპუბლიკა უნდა დატოვონ.

მოგვიანებით, მომხდარს მოლდოვას პრეზიდენტი, იგორ დოდონი Facebook-ში გამოეხმაურა და საგარეო უწყების ქმედებას პროვოკაციული უწოდა.

მან აღნიშნული ფაქტი დაგმო და თქვა, რომ ის „ქვეყნის პრეზიდენტის წინააღმდეგ არის მიმართული, რომელიც ცდილობს რუსეთთან ურთიერთობა დაალაგოს“.

დოდონმა მომხდარში დასავლეთის კვალი დაინახა

მონიკა დავლიანიძე