მსოფლიო

მოკლული ბულგარელი ჟურნალისტის საქმე გახსნილია - პოლიციის მტკიცებით, დანაშაული მის პროფესიულ საქმიანობას არ უკავშირდება

ბულგარეთის მთავარი პროკურორის განცხადებით, ბულგარელი ჟურნალისტის, ვიქტორია მარინოვას მკვლელობის საქმე გახსნილია.

მარინოვას საქმეზე გერმანიაში ადგილობრივმა პოლიციამ 21 წლის ბულგარეთის მოქალაქე სევერინ კრასიმიროვი დააკავა, რომელსაც დაუსწრებლად წაუყენებენ ბრალს მკველობასა და გაუპატიურებაში.

ქვეყნის მთავარი პროკურორის განცხადებით, დანაშაული სპონტანური იყო და არ უკავშირდება ჟურნალისტის პროფესიულ საქმიანობას. პოლიციამ აღმოაჩინა მსხვერპლის დნმ-ი მამაკაცის ტანსაცმელზე, ხოლო დაკავებულის დნმ-ი - მსხვერპლზე. მამაკაცი ქალაქ რუსეში დაიბადა, სადაც დანაშაული მოხდა.ის ადრეც იყო ნასამართლევი ფერადი მეტალების ქურდობისთვის.

რამდენიმე დღის წი გახდა ცნობილი, რომ ქალაქ რუსეს პარკში, მდინარე დუნაისთან ბულგარეთში ადგილობრივი ტელევიზია TVN-ის გამომძიებელი ჟურნალისტი, 30 წლის ვიქტორია მარინოვა მოკლული და გაუპატიურებული იპოვეს.

ერთ-ერთი ვერსია მის მკვლელობას ჟურნალისტის პროფესიულ საქმიანობას უკავშირებდა. ვიქტორია მარინოვას მიჰყავდა გადაცემა „დეტექტორი“ ჩრდილო-აღმოსავლეთ ბულგარეთის ერთ-ერთ ყველაზე პოპულარ ტელევიზიაზე. 30 სექტემბრის გადაცემაში მარინოვამ ინტერვიუ აიღო ორი რუმინელი ჟურნალისტისგან, რომლებიც იძიებდნენ ევროკავშირის ფონდებში რამდენიმე პოლიტიკოსისა და ბიზნესმენის სავარაუდო კორუფციულ საქმიანობას. ინტერვიუს გაშვებამდე ბულგარეთის ხელისუფლებამ რუმინელი ჟურნალისტები დააკავა.

2017 წლის დასაწყისიდან ვიქტორია მარინოვა უკვე მე-4 ჟურნალისტია, რომელიც ევროკავშირში მოკლეს. გასული წლის აგვისტოში მოკლეს შვედი ჟურნალისტი კიმ ვაალი, ოქტომბერში მალტელი ჟურნალისტი დაფნა კარუანა გალიცია, ასევე ოქტომბერში სლოვაკი გამომძიებელი-ჟურნალისტი იან კუციაკა თავის მეუღლესთან ერთად მოკლული იპოვეს.