კომენტარი

„მოამბე“ ვერ ხედავს. პრეზიდენტი დუმს. პრემიერი ფაროსანას დასდევს - ნატო ჩხეიძე გუგუტიანთკარში შექმნილ ვითარებაზე

პარლამენტის დამოუკიდებელი დეპუტატი ნატო ჩხეიძე სოფელ გუგუტიანთკარში ე. წ ბორდერიზაციის პროცესს ეხმაურება და სოციალურ ქსელში წერს:

„სერიიდან: აბა, შეხედეთ:

დღევანდელი 12-საათიანი საინფორმაციო გამოშვებების ინფორმაციები ურთიერთსაწინააღმდეგოა გუგუტიანთკარში არსებული მდგომარეობის შესახებ.

„მოამბე“ ამბობს, რომ დღეს გუგუთიანტკარში არ გამოჩენილან სამხედროები და არ განუახლებიათ ბორდერიზაციაო.

„კურიერი“ ამბობს, დღეს გამოჩნდნენ საოკუპაციო ძალის წარმომადგენლები გუგუთიანტკარში და ბუჩქებს კაფავენ, სავარაუდოთ, ბოძების ჩასარჭობათო.

„მოამბე“ ვერ ხედავს.

პრეზიდენტი დუმს.

პრემიერი ფაროსანას დასდევს.

პარლამენტის სპიკერი ამბობს, რომ ოპოზიციის ნაწილი სამარცხვინოთ იქცევა და არის ომის მომხრეო.
(ანუ სპიკერის თქმით, სამარცხვინოთ იქცევა ოპოზიციის ის ნაწილი, ვინც საპროტესტო განცხადებებისკენ მოუწოდებს ქვეყნის მმართველ ძალას).

გამოდის, რომ ზემოთჩამოთვლილი ვიპ ადამიანები საამაყოდ იქცევიან და მშვიდობისა და ქვეყნის სასიკეთოდ ირჯებიან...

მთავრობის დუმილი და უმოქმედობა და „საზოგადოებრივი მაუწყებლის“ სიბეცე მიუთითებს, რომ რაც გუგუთიანტკარში ხდება, მათი თანხმობით ხდება, ადრე შეთანხმებული ან ახლადდათანხმებული რაიმე ოფიციალური და ჯერ გასაიდუმლებული შეთანხმებით.

იმედი ვიქონიოთ, რომ ფაროსანასთან უკვე ბრძოლამოგებული პრემიერი და მისი მთავრობა ამ საშინელ ეჭვებს გაგვიფანტავს და პოლიტიკურ ფაროსანებსაც გასცემენ შესაფერის პასუხს.“ - დაწერა ნატო ჩხეიძემ.