კომენტარი

მმართველი გუნდის ინტერესებში არ არის თავისუფალი სიტყვის შეზღუდვა და დამოუკიდებელი მედიასაშუალებების კონტროლი - ნუკრი ქანთარია

საპარლამენტო უმრავლესობის წევრი, ნუკრი ქანთარია მიესალმება პრემიერ-მინისტრ გიორგი კვირიკაშვილის ინიციატივას საქართველოში საერთაშორისო დონის მედიაექსპერტების მოწვევის თაობაზე.

„ხელისუფლება ყოველთვის აცხადებდა და დღესაც ვიმეორებთ, რომ მმართველი გუნდის ინტერესებში არ არის თავისუფალი სიტყვის შეზღუდვა და დამოუკიდებელი მედიასაშუალებების კონტროლი, მათ სარედაქციო პოლიტიკაში ჩარევა და ასე შემდეგ. ქვეყანამ დიდი ხანია დემოკრატიული განვითარება და ევროპული ღრებულებები აირჩია.

ცოტა ხნის წინ კი უმნიშვნელოვანესი ფაქტი მოხდა - საქართველომ ვიზის ლიბერალიზაცია მიიღო და ამ ფონზე ძახილი იმისა, რომ ხელისუფლება დამოუკიდებელ მედიას ებრძვის, რბილად რომ ვთქვა, არასწორია. გასაგებია, ჩვენი პოლიტიკური კონკურენტების ინტერესები და მათი პრობლემა, მით უმეტეს ნაციონალური მოძრაობის, რომლის უშუალო ტრიბუნაც არის „რუსთავი 2“, მაგრამ მოვლენები ობიექტურად უნდა შევაფასოთ“, - აცხადებს ნუკრი ქანთარია.

დეპუტატი ფიქრობს, რომ მედიაომბუდსმენის ინსტიტუტით უზრუნველყოფილი იქნება მაქსიმალური გამჭვირვალობა და პლურალისტული მედია გარემო.

„ეს მართლაც მოხსნის ყველა კითხვის ნიშანს, რაც მედიათავისუფლების კუთხით არსებობს და რაზეც ყოფილი ხელისუფლების წარმომადგენლები აპელირებენ, მიუხედავად იმისა, რომ ხელისუფლების არცერთი წარმომადგენელი არ სახელდება, რომელსაც 2012 წლის შემდგომ რაიმე სახის ჩარევის მცდელობა ჰქონოდა რომელიმე მედიასაშუალების სარედაქციო პოლიტიკაში“, - აცხადებს ნუკრი ქანთარია.

მისივე თქმით, დღეს საქართველოში თავისუფალ სიტყვას საფრთხე არ ემუქრება.

„რაც შეეხება იმას, რომ თითქოს ხელისუფლებას არ აწყობს კრიტიკული მედია და რომ „რუსთავი 2“-ის სარედაქციო პოლიტიკაზეა „ქართული ოცნების“ ხელისუფლებაში დარჩენა-არდარჩენის საკითხი, ფაქტია, რომ აქამდე მმართველ გუნდს არჩევნების მოგება არ გაჭირვებია, მიუხედავად იმისა, რომ ზემოაღნიშნული ტელევიზია ჩვეულ რეჟიმში და ტონალობაში აგრძელებდა ფუნქციონირებას ყოველი არჩევნების წინ, - განაცხადა ნუკრი ქანთარიამ.

ნინო ექვთიმიშვილი