კომენტარი

მმართველი გუნდიდან კიდევ ერთხელ ვხედავ, რომ ხელს აფარებენ ჩემი შვილის მკვლელებს - ზაზა სარალიძე

მოეშვან პოლიტიკურ განცხადებებს და მიხედონ საქმეს ისე, როგორც საჭიროა, - ეს განცხადება ხორავას ქუჩაზე მოკლული დავით სარალიძის მამამ, ზაზა სარალიძემ, საგამოძიებო კომისიის მუშაობასთან დაკავშირებით გააკეთა.

მისი თქმით, საგამოძიებო კომისია მისი შვილის მკვლელობის საქმის გამოძიების მიზნით შეიქმნა, თუმცა როგორც სარალიძე აღნიშნავს, ,,ქართული ოცნების“ წევრები კონკრეტული პირებისთვის ხელის დაფარებას ცდილობენ.

„აქ არის გამოსავლენი ჩემი შვილის მკვლელები და არა ვიღაცეების აზრები, რომ პოლიტიკური ჭრილია. არ მაინტერესებს მე არანაირი პოლიტიკური ჭრილები. ეს კომისია არის კონკრეტულად მკვლელობის საქმეზე შექმნილი. რა შუაშია აქ პოლიტიკა? დადგნენ და გამოიძიონ და დადონ ისეთი დასკვნა, როგორიც საჭიროა, მაგრამ მმართველი გუნდიდან კიდევ ერთხელ ვხედავ, რომ ხელს აფარებენ ჩემი შვილის მკვლელებს. შსს-ს ეს ყველაფერი დადგენილი აქვს. პირდაპირ შემიძლია გითხრათ, რომ პროკურატურა მაქსიმალურად ცდილობს ხელი დააფაროს,“ - განაცხადა ზაზა სარალიძემ.

დღეს არასრულწლოვანების მკვლელობის საქმეზე შექმნილი საგამოძიებო კომისიის წევრები სისხლიანი გარჩევის საქმის გამოძიების დროს გამოკვეთილ დარღვევებზე იმსჯელებენ.

კონკრეტული მაღალჩინოსნების პასუხისმგებლობის დაყენებასთან დაკავშირებით კომისიის წევრები მომდევნო სხდომაზე იმსჯელებენ. ისინი ასევე იმ რეკომენდაციებს განიხილავენ, რომლებიც საგამოძიებო უწყებების მიმართ უნდა გასცენ.