კომენტარი

მიზანმიმართულად მიმდინარეობს შეტევა სასამართლოზე ტელეკომპანია რუსთავი 2-ის და მისი გენერალური დირექტორის მხრიდან - ეკა ბესელია

საპარლამენტო უმრავლესობის წევრი, ეკა ბესელია თბილისის მერიის მიერ უზენაესი სასამართლოს მოსამართლის ოჯახისთვის 1 მილიონი ლარის გადაცემის საკითხის განხილვას სასამართლოსადმი მიზანმიმართულ შეტევად აფასებს.

მისი თქმით, რუსთავი 2 და კომპანიის გენერალური მდივანი, ნიკა გვარამია სასამართლოზე პირდაპირ შეტევას ახორციელებენ.

„ვითარება საკმაოდ გართულდა უკვე და როგორც ვხედავთ, ძალიან ღიად, დაუფარავად, ყოველგვარი შეფუთვის გარეშე, მიზანმიმართულად მიმდინარეობს შეტევა სასამართლოზე ტელეკომპანია რუსთავი 2-ის და მისი გენერალური დირექტორის მხრიდან, რომელიც არ ერიდება მოსამართლეების მიმართ პირდაპირი შეტევის განხორციელებას. ეს არის კლასიკური მაგალითი სასამართლოზე ზეწოლის განხორციელების,“ - განაცხადა ეკა ბესელიამ.

დეპუტატის თქმით, მერიამ სტიქიით დაზარალებულებს დახმარება გაუწია და ამის განხილვას მსგავს პოლიტიკურ ჭრილში დაუშვებლად მიიჩნევს.

,,იმ ცნობილი მოვლენების დროს, როდესაც სტიქიით დაზალარებულთა მიმართ უპრეცედენტო სოლიდარობა განხორციელდა და იყო ძალების სრული მობილიზება სტიქიით დაზარალებულთა დასახმარებლად, ამ პროცესში გაწეული დახმარება თუ აუცილებელი გადაწყვეტილების განხილვა პოლიტიკურ ჭრილში, მიმაჩნია სრულიად დაუშვებლად და სრულიად გაუმართლებელ ქმედებად’’, - განუცხადა ჟურნალისტებს ეკა ბესლეიამ.

ნინო ექვთიმიშვილი