კომენტარი

მივესალმები, რომ ორივე ორგანიზაცია შეკრებისა და მანიფესტაციის ფორმას არ იყენებს სხვა მოწყვლადი თემის პროვოცირებისთვის - ზაქარია ქუცნაშვილი

საპარლამენტო უმრავლესობის წევრი ზაქარია ქუცნაშვილი მიესალმება ლგბტ-აქტივისტებისა და „ქართული მარშის“ გადაწყვეტილებას აქციების გაუქმების შესახებ. დეპუტატი შეფასებით, მისაღებია, როცა ჯგუფები მოქმედებენ, როგორც საზოგადოებაში „მშვიდობის შემომტანები“.

„ქართული საზოგადოებისა და ამ მოწყვლადი ჯგუფების დამოკიდებულება იცვლება, რაც მისასალმებელია, როცა ისინი პროვოკატორებივით კი არ უნდა იქცეოდნენ, არამედ როგორც საზოგადოებაში მშვიდობის შემომტანები.

მე მივესალმები ორივე ორგანიზაციის გადაწყვეტილებას, როდესაც ისინი თავისი შეკრებისა და მანიფესტაციის ფორმას არ იყენებენ სხვა მოწყვლადი თემის პროვოცირებისთვის“, - თქვა ქუცნაშვილმა.

ცნობისთვის, დღეისთვის, 19 საათზე კანცელარიასთან დაგეგმილი ჰომოფობიასა და ტრანსფობიის საწინააღმდეგო აქცია ლგბტ-აქტივისტებმა გააუქმეს. „თანასწორობის მოძრაობის“ წარმომადგენელთა განმარტებით, მათ ეს ნაბიჯი სამოქალაქო დაპირისპირების თავიდან ასაცილებლად გადადგეს.

რუსთაველის გამზირზე დაგეგმილი აქცია „ქართულმა მარშმაც“ გააუქმა და ეს ლგბტ-აქტივისტების გადაწყვეტილებით ახსნა.

17 მაისს აღინიშნება ჰომოფობიასა და ტრანსფობიასთან ბრძოლის საერთაშორისო დღე, 2014 წლიდან კი საპატრიარქო ოჯახის სიწმინდის დღეს აღნიშნავს.