მსოფლიო

მიწისძვრამ აზერბაიჯანში სახლები დააზიანა

აზერბაიჯანში, ზაქათალას რაიონში გუშინდელმა მიწისძვრამ სახლები და სოციალური ობიექტები დააზიანა. ბზარები გაჩნდა სოფლებში: ალიაბადში, გიოზბარახში, იუხარიში, ტალაში, იენი სუვაღილსა და ლაგიჯში მდებარე საცხოვრებელ სახლებში.

„მიწისძვრა იგრძნობოდა თითქმის ყველა სოფელში. არაფერი არ დანგრეულა, თუმცა კერძო სახლები და სოციალური ობიექტები მაინც დაზიანდნენ. კომისია დაადგენს ამ შენობების ავარიულობის ხარიხს“, - განაცხადა ზაქათალას რაიონის საგანგებო სიტუაციათა კომისიის თავმჯდომარემ ტოფიგ ახმედოვმა.

მისივე ინფორმაციით, მიწისძვრას მსხვერპლი არ მოჰყოლია.

„გუშინ, ქალაქ ზაქათალადან სამხრეთით 24 კილომეტრში დაახლოებით 6 მაგნიტუდის სიძლიერის მიწისძვვრა მოხდა. დაღუპულები და დაშავებულები არ არიან. ზარალი მიადგა საკარმიდამო მიწის ნაკვეთებს, ბზარები გაჩნდა სახლების კედლებზე. ამ დრომდე ვიღებთ შეტყობინებებს მიწისძვრისგან მიყენებული ზიანის შესახებ“, -დაამატა ახმედოვმა.

მისი თქმით, სკოლებში გაკვეთილები ჩვეულებრივად მიმდინარეობს, რადგან შენობები „პრაქტიკულად ახალია“. ახმედოვის ინფორმაციით, ყველა სამსახური გაძლიერებულ რეჟიმში მუშაობს, ხოლო სინათლის, გაზისა და წყლის მიწოდებასთან დაკავშირებით პრობლემები არაა.

გამოცემა Day.Az-მა ვუსალ რაფიგიზის სახელობის სეისმოლოგიური სამსახურის რესპუბლიკურ ცენტრზე დაყრდნობით იუწყება, რომ გუშინდელ მიწისძვრას 75 განმეორებითი ბიძგი მოჰყვა, თუმცა ისინი სუსტია და არ იგრძნობა.

ამავე გამოცემის ცნობით, მიწისძვრის შედეგად გახას მკვიდრმა, 13 წლის გულარ დურმუშზადემ ფეხი მოიტეხა. სოფელ გეიამის მცხოვრებლების თქმით, 63 წლის სოლტან განდახოვს მიწისძვრის მომენტში მიღებული ძლიერი სტრესის გამო გულის შეტევა დაემართა, რის გამოც დაიღუპა.

ცნობისთვის, გუშინ თბილისის დროით, 22:40 საათზე, აზერბაიჯანში, საქართველოს სახელმწიფო საზღვრიდან 15 კმ-ში მოხდა 5.7 მაგნიტუდის სიდიდის მიწისძვრა. ბიძგები იგრძნობოდა თბილისშიც.