კომენტარი

მინისტრები ვერ გადავლენ მოტოროლებზე, მაგრამ არ არის საჭირო 100 ათასიანი მანქანებით სიარული - ნუკრი ქანთარია

მინისტრები ვერ გადავლენ მოტოროლებზე, მაგრამ გარკვეულწილად, ცოტა თანხა უნდა დაზოგონ და არ არის საჭირო 100 ათასიანი მანქანებით სიარული, - განაცხადა „ქართული ოცნების“ წევრმა, ნუკრი ქანთარიამ სამთავრობო სტრუქტურებში ე.წ. შავი ჯიპების თემის კომენტირებისას.

მმართველი გუნდის წევრის თქმით, იმისთვის, რომ ამ საკითხზე კითხვები აღარ იყოს, მთავრობამ და საჯარო დაწესებულებებმა შავ ჯიპებზე უარი უნდა თქვან.

„ველოსიპედები შეიძლება, მაგრამ რახან ჩვენ მთაგორიანი ადგილი გვაქვს, ამდენად გაძნელდება ველოსიპედები, ყველას არ აქვს ძალა, რომ აღმართებში მიაწვეს და თუ ამომრჩეველიც დაეხმარება ამ მიწოლაში, მაშინ შეიძლება ეს მსჯელობის საგანი გახდეს,“- განაცხადა ნუკრი ქანთარიამ.

ე.წ. შავი ჯიპების თემაზე დღეს პრემიერ-მინისტრმა ილაპარაკა. მამუკა ბახტაძის განცხადებით, ზოგიერთ სახელმწიფო უწყებაში აღნიშნულ საკითხთან დაკავშირებით არსებული ვითარება, კატეგორიულად მიუღებელია.