მსოფლიო

მინიმალური ხელფასი 100 ევროთი გაიზრდება, ხოლო დაბალშემოსავლიანი პენსიონერებისთვის გადასახადები გაუქმდება - ემანუელ მაკრონი უკან იხევს

საფრანგეთის პრეზიდენტი ემანუელ მაკრონი დაპირდა მოსახლეობას, რომ 2019 წლიდან მინიმალური შრომითი ანაზღაურება 100 ევროთი გაიზრდება, ხოლო დაბალშემოსავლიანი პენსიონერებისთვის გადასახადები გაუქმდება.

სატელევიზიო გამოსვლისას მაკრონმა დაგმო ანტისამთავრობო პროტესტის მონაწილეთა ძალადობა, თუმცა აღნიშნა, რომ ე.წ. „ყვითელი ჟილეტების“ მოძრაობის სიბრაზე „იყო ღრმა და მრავალმხრივ სამართლიანი“.

მაკრონის გადაწყვეტილებით, დამსაქმებლები არ დაიბეგრებიან იმ პრემიების გაცემის გამო, რომლებსაც ისინი თანამშრომლებს გადაუხდიან წლის ბოლოს.

თუმცა, მაკრონმა უარი თქვა სიმდიდრეზე გადასახადის დაწესებაზე, რასაც დემონსტრანტები ითხოვდნენ. საფრანგეთის პრეზიდენტმა აღნიშნა, რომ „ეს ჩვენ დაგვასუსტებს, ჩვენ გვჭირდება სამუშაო ადგილების შექმნა“.

გუშინ მაკრონი პროფესიული კავშირებისა და დამსაქმებელთა ორგანიზაციების წარმომადგენლებს შეხვდა და მათთან მთავრობის სამოქმედო გეგმა განიხილა.

საფრანგეთის პრეზიდენტს უკან დახევა მოუწია ე.წ. „ყვითელი ჟილეტების“ მოძრაობის ოთხკვირიანი პროტესტის გამო. თავდაპირველად დემონსტრანტები საწვავის ფასის დაგეგმილი გაზრდის წინააღმდეგ გამოვიდნენ, შემდგომ პროტესტი ანტისამთავრობო მოძრაობაში გადაიზარდა.

ე.წ. „ყვითელი ჟილეტების“ პროტესტის გამო საფრანგეთის მთავრობას მოუწია ბიუჯეტის პროექტიდან საწვავის ფასის გაზრდის შესახებ გადაწყვეტილების ამოღება.

ბოლო მასშტაბურ აქციაზე 136 000-მა დემონსტრანტმა მიიღო მონაწილეობა. პოლიციასთან შეტაკებისას 118 ადამიანი დაშავდა, ხოლო 1200 დააკავეს.