კომენტარი

მინდელის შახტში დარღვევები იყო, რამაც ტრაგედია გამოიწვია და რისი თავიდან აცილებაც შესაძლებელი იყო - სოზარ სუბარი

რეგიონული განვითარების საკითხებში პრემიერ-მინისტრის მრჩევლის, სოზარ სუბარის განცხადებით, ტყიბულში, მინდელის შახტში არსებული ხარვეზების თავიდან აცილება შესაძლებელი იყო.

„მინდელის შახტში დარღვევები იყო, რამაც ტრაგედია გამოიწვია და რისი თავიდან აცილებაც შესაძლებელი იყო“, -თქვა სუბარმა პირველი არხის გადაცემაში „აქტუალური თემა მაკა ცინცაძესთან ერთად“ სტუმრობისას.

მან განაცხადა, რომ „ვიდრე საბოლოო დასკვნები არ დაიდება, ამ ეტაპზე, ამაზე მეტს არ ვიტყვი და არც უწყებები იტყვიან“.

სუბარმა დასძინა, რომ ადამიანის სიცოცხლეზე ძვირფასი არაფერი არაა და მთავრობა იფიქრებს ტყიბულის ალტერნატიული განვითარების მოდელზე.

„ავტორიტეტული კვლევითი კომპანიის მიერ ზუსტი დასკვნის დადების შემდეგ შეგვეძლება ვთქვათ, რა გზით მივდივართ, ამ შახტების ფუნქციონირება და ადამიანური ტრაგედიების თავიდან აცილება მართლაც შეუძლებელია, თუ შესაძლებელია, შახტებმა ცივილიზებულად იფუნქციონირონ. თუ კითხვა დაისვა, ამ შემთხვევაში, ჩვენ ამ თუ-ს მოვხსნით იმით, რომ ყველა შემთხვევაში ვიფიქრებთ, ტყიბულისთვის რა ალტერნატივების გამონახვა შეიძლება, რადგან ადამიანის სიცოცხლესა და ჯანმრთელობაზე ძვირფასი არაფერია“, – განაცხადა სუბარმა.

შეკითხვაზე, დადგა თუ არა კონკრეტული პირების პასუხისმგებლობის საკითხი ბოლო პერიოდში მომხდარი ტრაგედიების გამო, სუბარმა უპასუხა, რომ ბოლო პერიოდში მომხდარი ტრაგედიების გამოძიება თითქმის ბოლომდეა გასული და შედეგები მალე გახდება ცნობილი.

„საზოგადოებას ვარწმუნებ, დასჯილი იქნება ყველა დამნაშავე, ვისი ბრალეულობაც გამოიკვეთება“, – განაცხადა სუბარმა.

როგორც პრემიერის მრჩეველმა აღნიშნა, ტყიბულში თუ სხვაგან, ტრაგედიის ბოლომდე გამორიცხვა შეუძლებელია, მაგრამ უსაფრთხოების სისტემების უქონლობის გამო, მუდმივად იმის მოლოდინი არ უნდა გვქონდეს, რომ რამდენიმე თვეში ერთხელ ტრაგედია მოხდება.

მისი თქმით, „ინდუსტრიულ ჯგუფს“ სახელმწიფოს მიმართ აქვს გარკვეული ვალდებულებები, რომლებიც შესრულებული არ არის.

„მეშახტეთა ხელფასებს რაც შეეხება, „ინდუსტრიული ჯგუფის“ მიერ პირველივე დღეს ითქვა, რომ ისინი მეშახტეების მინიმუმ, ერთი თვის ხელფასს უპრობლემოდ გადაიხდიან. ვფიქრობ, ისეთი ბალანსი მოინახება, რომ თანამშრომელთა მოთხოვნებიც დაკმაყოფილდეს და ძალიან არც ამ კომპანიამ იზარალოს. ამ პოლიტიკის გატარებაში სახელმწიფო მინიმუმ, შუამავალი იქნება და თუ საჭირო გახდება, უფრო მეტადაც ჩაერევა“, – განაცხადა სოზარ სუბარმა.

ორშაბათს გამთენიისას ტყიბულში, მინდელის სახელობის შახტში 4 მეშახტე დაიღუპა, ხოლო 6 დაშავდა.

გამოძიების ვარაუდით, შახტის ერთ-ერთ გვირაბში მეთანის აფეთქების შედეგად კედლების დეფორმაციას ჭერის ჩამოშლა მოჰყვა.