კომენტარი

მიხიელ სააკაშვილი ევრაზიული მასშტაბის ავანტიურისტად ჩამოყალიბდა - დავით უსუფაშვილი

„შენების მოძრაობის“ ლიდერის დავით უსუფაშვილის შეფასებით, მიხეილ სააკაშვილი ევრაზიული მასშტაბის პოლიტიკურ ავანტიურისტად ჩამოყალიბდა.

როგორც უსუფაშვილმა ჟურნალისტებს განუცხადა, ავანტიურიზმს არ აქვს საზღვრები.

„არსებობენ სოფლის დონის ავანტიურისტები, რეგიონის დონის, ქალაქის დონის. მიხეილ სააკაშვილი ჩამოყალიბდა ევრაზიული მასშტაბის პოლიტიკურ ავანტიურისტად, რომელსაც ერთადერთი მიზანი აქვს- საკუთარი ინტერესების დაკმაყოფილება. ამის გამო ის მზად აღმოჩნდა საქართველო მიეყვანა უფსკრულის პირას, შემდგომ ის უკრაინაში გადავიდა და ახლა როგორც მის ქმედებებს ეტყობა, მზადაა უფსკრულის პირას მიიყვანოს ეს ქვეყანაც საკუთარი პატივმოყვარეობის დასაკმაყოფილებლად. მე არ გამიკვირდება თუ მისი შემდგომი გაჩერება იქნება სადმე აფრიკაში და იქაც ასეთივე დამაჯერებლობით ისაუბრებს, თუ როგორ უყვარს აფრიკელი ხალხი, რადგან თავად არის დმანისელი მზიას და ზეზვას შთამომავალი, ისინი კი აფრიკიდან ჩამოვიდნენ აქ. აი ასეთი უკიდეგანო ავანტიურიზმით არის იგი მზად გამოუცხადოს ერთგულება თან ქართველ ხალხს და თან უკრაინელ ხალხს“,- განაცხადა უსუფაშვილმა.

მისი თქმით, სააკაშვილს ყველამ თავი უნდა დაანებოს, რადგან „ვიდრე მასზე ვსაუბრობთ, სიუჟეტებს ვამზადებთ, კომენტარებს ვაკეთებთ, ეს სწორედ მის ავანტიურიზმს კვებავს და ახალ-ახალ სიურპრიზებს მოამზადებს“.

მონიკა დავლიანიძე