მსოფლიო

მიხეილ სააკაშვილმა გადაწყვიტა, რომ უკრაინაში ლეგალურად დარჩენის საქმეზე მიმდინარე სასამართლო სხდომებს აღარ დაესწრება

საქართველოს ყოფილმა პრეზიდენტმა და ოდესის ექს-გუბერნატორმა მიხეილ სააკაშვილმა კიევის სააპელაციო სასამართლოს დარბაზი დატოვა, სადაც განიხილებოდა მისი საჩივარი სახელმწიფო საიმიგრაციო სამსახურის წინააღმდეგ. მან აღნიშნა, რომ აღარ ივლის მის ექსტრადაციასთან დაკავშირებულ სასამართლო სხდომებზე.

„ამ სხდომაზე დასწრების მომდევნო საჭიროებას ვერ ვხედავ. მათ სურთ იურიდიული პროცედურის იმიტაცია, ამიტომ ჩემი იურისტები დარჩებიან. ასევე ვაგრძელებ სასამართლოებში სიარულს ხალხისთვის, რომლებიც ჩემს მხარდასაჭერად მოდიან. თუმცა ისინიც მთავაზობენ, აღარ ვიარო ზემოდან მართულ სხდომებზე“, - განაცხადა სააკაშვილმა. სხდომაზე მისი ორი ადვოკატი: რუსლან ჩერნოლუცკი და პაველ ბოგომაზოვი დარჩნენ.

მან საკუთარი პოზიცია განმარტა იმით, რომ სასამართლო არ ითვალისწინებს არცერთ მის შუამდგომლობას. სააკაშვილის მტკიცებით, სასამართლოს არ აუხსნია, რატომ იცვლებოდნენ მოსამართლეები პროცესის განმავლობაში.

სააკაშვილმა აღნიშნა, რომ სასამართლოებში სიარულის ნაცვლად ის 18 თებერვლისთვის დაგეგმილი აქციისთვის მოემზადება.