მსოფლიო

მიხეილ სააკაშვილმა 3 დეკემბერს უკრაინის პრეზიდენტის მიმართ „ეროვნული იმპიჩმენტის“ პროცედურის ამოქმედება არ გამორიცხა

საქართველოს ყოფილმა პრეზიდენტმა და ოდესის ექს-გუბერნატორმა მიხეილ სააკაშვილმა არ გამორიცხა, რომ 3 დეკემბერს დააყენებს უკრაინის პრეზიდენტ პეტრო პოროშენკოს მიმართ „ეროვნული იმპიჩმენტის“ პროცედურას.

ამის შესახებ მან უკრაინის უმაღლეს რადასთან გამართულ მიტინგზე თქვა, სადაც შეკრებილებმა მოითხოვეს დეპუტატობის ხელშეუხებლობის გაუქმება, საარჩევნო კანონმდებლობის შეცვლა და ანტიკორუფციული სასამართლოს შექმნა.

„თუ ისინი [ხელისუფლება] გააგრძელებს ჩვენი მოთხოვნების იგნორირებას... , მაშინ გთავაზობთ 3 დეკებერს დავიწყოთ ეროვნული იმპიჩმენტის პროცესი. დაე, ხალხმა ქნას“, - განაცხადა სააკაშვილმა.

რას წარმოადგენს ეს პროცედურა, მას არ დაუკონკრეტებია.

მან ასევე მოუწოდა საპროტესტო აქციის მონაწილეებს, შეიკრიბონ 12 ნოემბერს მიხაილოვის მოედანზე და მოაწყონ მარში ანტიკორუფციული სასამართლოს კანონის შემოღებისა და იმპიჩმენტის გამოცხადების მოთხოვნით. სააკაშვილმა აღნიშნა, რომ მარშში მიიღებს მონაწილეობას ცოლთან და შვილთან ერთად.

უკრაინის კონსტიტუციით, უკრაინის პრეზიდენტისთვის იმპიჩმენტის გამოცხადება შესაძლებელია, თუკი მას გამოიჭერენ სახელმწიფო ღალატში ან სხვა დანაშაულში. პროცედურა მოითხოვს პარლამენტში დროებითი საგამოძიებო კომისიის შექმნას, რომლის დასკვნას განიხილავენ უმაღლესი რადას სხდომაზე. შემდგომ პრეზიდენტისთვის ბრალის წასაყენებლად 226 დეპუტატის თანხმობაა საჭირო, ხოლო მერე 300-მა დეპუტატმა უნდა მისცეს ხმა პრეზიდენტისთვის იმპიჩმენტის გამოცხადებას. კენჭისყრამდე რადას დეპუტატებმა უნდა მიიღონ საკონსტიტუციო სასამართლოს დასკვნა, სადაც იქნება მითითებული, ჩაიდინა თუ არა ქვეყნის პირველმა პირმა დანაშაული.

ანა მებურიშვილი