მსოფლიო

მიხეილ სააკაშვილისთვის პასპორტი არ ჩამოგვირთმევია - უკრაინული პოლიცია

ლვოვის საოლქო პოლიციაში უარყვეს ინფორმაცია, რომ სამართალდამცველებმა ავტობუსიდან მიხეილ სააკაშვილის პასპორტი მოპარეს.

„პოლიციელების მიერ პასპორტის ჩამორთმევის შესახებ გაჟღერებული განცხადება ეწინააღმდეგება იმ გარემოებებს, რაც მოხდა სასაზღვრო-გამშვებ პუნქტ შეგინში უკრაინის საზღვარზე რამდენიმე პირის უკანონოდ გადაყვანისას. კერძოდ, გუშინ, მასობრივი ღონისძიებების დროს გამშვებ პუნქტ შეგინში პოლიციელები იცავდნენ საჯარო უსაფრთხოებასა და საყოველთაო წესრიგს. ამავე დროს პოლიციას არ ჩამოურთმევია იმ პირის პასპორტი, რომელიც ამის შესახებ განაცხადა“, - წერია ლვოვის საოლქო პოლიციის განცხადებაში.

დღეს ლვოვში გამართულ პრესკონფერენციაზე მიხეილ სააკაშვილმა განაცხადა, რომ უკრაინელმა პოლიციელებმა მას პასპორტი მოპარეს.

„როცა ხალხმა, ჩემ დაუკითხავად, შემიყვანა უკრაინაში, პასპორტი ავტობუსში დამრჩა. მოვიდა პოლიცია, გაჩხრიკეს ავტობუსი და ჩემი პასპორტი მომპარეს. ახლა პასპორტი მათთანაა“, - თქვა ოდესის ყოფილმა გუბერნატორმა.

შეგახსენებთ, გუშინ 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი „შეგინი“ გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

ანა მებურიშვილი