კომენტარი

მიხეილ სააკაშვილის წინააღმდეგ საქართველოში სისხლის სამართლის ოთხი საქმეა აღძრული და კარგია, რომ ასეთ დროს თავად ესწრებოდეს სასამართლო პროცესებს - სოზარ სუბარი

ერთ რამეში ვარ დარწმუნებული, რომ ადრე თუ გვიან ყველა დამნაშავე აგებს პასუხს ჩადენილი დანაშაულისთვის, - განაცხადა მთავრობის სხდომის დასრულების შემდეგ ლტოლვილთა და განსახლების მინისტრმა, სოზარ სუბარმა საქართველოს ყოფილი პრეზიდენტის, მიხეილ სააკაშვილის საქართველოსთვის გადმოცემის საკითხის კომენტირებისას.

სუბარის თქმით, მიხეილ სააკაშვილის წინააღმდეგ საქართველოში სისხლის სამართლის ოთხი საქმეა აღძრული და კარგია, რომ ასეთ დროს ბრალდებული თავად ესწრებოდეს სასამართლო პროცესებს.

"სისხლის სამართლის ოთხი საქმეა აღძრული, ოთხივეზე მიმდინარეობს გამოძიება. ზოგადად, ძალიან კარგია, როდესაც ადამიანი, რომელზეც სასამართლოში მიდის პროცესი, თავად დაესწრება პროცესს. ეს უკეთესია მისი დაცვისთვისაც, გამოძიებისთვისაც, კითხვებს პირდაპირ გაეცემა პასუხი. ასე რომ, თუ გამოცხადდება თავისი ნებით, ეს იქნება გაცილებით უკეთესი, რათა სასამართლო იყოს სამართლიანი.

რაც შეეხება საქართველოს პოზიციას, ბუნებრივია, როდესაც ადამიანზე არის საქმე აღძრული, მის მიმართ არის გამოცხადებული ძებნა, ეს არის ჩვეულებრივი პროცესი. ერთ რამეში ვარ დარწმუნებული რომ ადრე თუ გვიან ყველა დამნაშავე აგებს პასუხს მის მიერ ჩადენილი დანაშაულისათვის",-აღნიშნა სოზარ სუბარმა.

შეგახსენებთ, რომ საქართველოს მთავარმა პოკურატურამ მიხეილ სააკაშვილის ექსტრადირების მოთხოვნით უკრაინიას პირველ სექტემბერს მიმართა.

ნინო ექვთიმიშვილი