მსოფლიო

მიხეილ სააკაშვილის გამო პოლონეთის საგარეო უწყებაში დაბარებული არ ვყოფილვარ- უკრაინის ელჩი პოლონეთში

პოლონეთში უკრაინის ელჩმა, ანდრეი დეშიცამ უარყო მედიაში გავრცელებული ინფორმაცია, რომ მიხეილ სააკაშვილის მიერ პოლონეთ-უკრაინის საზღვრის უკანონოდ გადაკვეთის გამო ის დაბარებული იყო პოლონეთის საგარეო საქმეთა სამინისტროში. ამის შესახებ დიპლომატმა ტვიტერის საკუთარ გვერდზე დაწერა.

„პოლონეთის რესპუბლიკის საგარეო საქმეთა სამინისტროში მიწვეული არ ვყოფილვარ. კავშირი გვქონდა პოლონელ პარტნიორებთან, ვეხმარებოდით უკრაინის მოქალაქეებს, რომლებიც ვერ ახერხებდნენ პერემიშლიადან [უკრაინის საზღვართან მდებარე ქალაქი] წასვლას“, -დაწერა დეშიცამ.

შეგახსენებთ, გუშინ 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი „შეგინი“ უკანონოდ გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი სისხლის სამართლის კოდექსის 348-ე მუხლის დანაშაულის ნიშნებსაც შეიცავს.

ანა მებურიშვილი