მსოფლიო

მიგრანტი ბავშვებისა და მათი მშობლების „განცალკევების პოლიტიკა“ აშშ-ის ისტორიის ერთ-ერთი უმძიმესი მომენტია - ჯო ბაიდენი

აშშ-ის ყოფილი ვიცე-პრეზიდენტის, ჯო ბაიდენის შეფასებით, ტრამპის ადმინისტრაციის მიგრანტი ბავშვებისა და მათი მშობლების განცალკევების პოლიტიკა „ერთ-ერთი უმძიმესი მომენტია“ ქვეყნის ისტორიაში.

„აბსურდული ტყუილი - ტყუილი იმიგრანტებზე, დანაშაულზე, ხარჯებზე საზოგადოებისთვის. ეს უბრალოდ ტყუილებია - ფაქტობრივად, მცდარი.

და ნახეთ, ხალხო, ამ ადმინისტრაციის პოლიტიკა, რომელიც პირდაპირ წაართვა ბავშვები მათ დედებსა და მამებს, არის ჩვენი ისტორიის ერთ-ერთი უმძიმესი მომენტი“, -განაცხადა ბაიდენმა.

მანვე აღნიშნა, რომ ადმინისტარციის პოლიტიკამ ზაფხულის განმავლობაში იყო „ადამიანურ ღირსებაზე სრული თავდასხმის“ ნაწილი.

მაისის დასაწყისიდან მიგრანტთა ოჯახების მიმართ განცალკევების პოლიტიკა ამოქმედდა, რაც ითვალისწინებს საზღვრის დამრღვევი მიგრანტის დაპატიმრებასა და მისი თანმხლები მოზარდის სპეციალურ თავშესაფარში გადაყვანას. „ნულოვანი ტოლერანტობის“ პოლიტიკის შედეგად აშშ-მექსიკის საზღვარზე 1700 არალეგალი მიგრანტი დააკავეს, მათი შვილები კი, 2300-მდე ბავშვი სპეციალურ თავშესაფარში გადაიყვანეს.

შექმნილმა ვითარებამ ამერიკულ საზოგადოებაში უკმაყოფილება გამოიწვია, რამაც აიძულა აშშ-ის პრეზიდენტი, დონალდ ტრამპი, ივნისში მოეწერა ხელი განკარგულებისთვის „განცალკევების პოლიტიკის“ დასრულების შესახებ.