კომენტარი

მგონია, რომ ეს შეიძლება, იყოს უფრო შორს მიმავალი გეგმის ნაწილი, ტელეკომპანიის დასაკუთრების - დავით ჯანდიერი `იბერიას` საქმეზე

„შოკირებული ვიყავი იმ საუბრების შინაარსით, რომელიც მოვისმინე, იმ მასშტაბებიდან და იმ მოცულობიდან გამომდინარე თანხის, რაზეც იქ არის საუბარი,“ - ეს განცახდება იურისტმა, საერთაშორისო სამართლის სპეციალისტმა, დავით ჯანდიერმა გააკეთა.

დავით ჯანდიერი ტელეკომპანია იბერიას ირგვლივ მიმდინარე მოვლენებს არჩევანის ეთერში აფასებს.
ჯანდიერის თქმით, რთულია ზუსტად იმის თქმა, ტელეკომპანიის ირგვლივ განვითარებული მოვლენები უკავშირდება თუ არა არჩევნების მოახლოებას.

„მგონია, რომ ეს შეიძლება, იყოს უფრო შორს მიმავალი გეგმის ნაწილი, ტელეკომპანიის დასაკუთრების, თუმცა ამავდროულად და ამასთან ერთად არის ასევე შოკისმომგვრელი ის მეორე ჩანაწერი, რომელიც მოვისმინეთ, როდესაც ხელისუფლების მაღალი თანამდებობის პირი, ეს ყოფილი თუ ახლანდელი, ეს ექსპერტიზამ უნდა დაადგინოს, როდესაც სხვა, გავლენიან ხელისუფლების პირებთან ერთად, ან მათი დავალებით ან მათთან თანამშრომლობით ელაპარაკება ბიზნესმენს და ეუბნება, რომ კონკრეტული საგადასახო გრაფიკის მისაღებად მან უნდა გადაიხადოს ე.წ. კონტრიბუცია, ანუ მისცეს გარკვეული თანხა,“ - განაცხადა ჯანდიერი.

დავით ჯანდიერის განცხადებით, აუცილებლად უნდა დაიწყოს საგამოძიებო მოქმედებები და ჩატარდეს ექსპერტიზები.

„ვინ უნდა გამოიძიოს? იმ პრივილეგირებულ პროკურორების კორპუსში მცხოვრებმა პრივილეგირებულმა პროკურორმა? ეს ცალკე პრობლემაა ამ ქვეყნის,“ - განაცხადა ჯანდიერმა.

ჯანდიერის თქმით, თუ აღნიშნული აუდიოჩანაწერის ავთენტურობა დადგინდება, გამოდის, რომ ფინანსთა სამინისტროში არსებობს ჯგუფი, რომელთაც შეუძლიათ კანონიერი მოთხოვნის შეჩერება.

„მათ შეუძლიათ, რომ ფინანსთა მინისტრს და შემოსავლების სამსახურს უთხრან, რომ ესა თუ ის კანონიერი საგადასახადო შეთანხმება გაფორმდეს შესაბამის გადასახადის გადამხდელთან,“ - განაცხადა ჯანდიერმა.

ჯანდიერის თქმით, ომეგა ჯგუფმა ფინანსთა სამინისტროს წელიწადნახევრის წინ მიმართა რესტრუქტურიზაციის შესახებ. კომისიას ორი თვის განმავლობაში უნდა განეხილა ეს მოთხოვნა, თუმცა, ამ დრომდე არ იხილავს კომისია.

"ეს ბადებს ეჭვს, რომ რატომ არც კის და არც არას არ ეუბნებიან ომეგა ჯგუფს, ე.ი. რაღაც ტიპის ზეწოლა ნამდვილად შეიძლება, ხორციელდებოდა ან ადრეც იყო განხორციელებული," - განაცხადა ჯანდიერმა. (rustavi2.ge)