კომენტარი

მეუფე პეტრეს მარგინალიზების მცდელობა მორიგი არაქრისტიანული აქტია - გოჩა მირცხულავა

რაც შეეხება ამ ძალმომრეობას და მუქარას, რომელსაც მეუფე იაკობი მოსალოდნელ სამთავრობო ცვლილებებთან დაკავშირებით აკეთებს, ეს არის შანტაჟი და საბოტაჟი ერთდროულად, - ამის შესახებ წერს ანალიტიკოსი გოჩა მირცხულავა სოციალურ ქსელში.

„საპატრიარქომ მეუფე პეტრეს მარგინალიზების პროცესი დაიწყო. რა შუაშია ნაციონალური მოძრაობა იმ პირობებში, როდესაც სწორედ მათი მმართველობის დროს საპატრიარქომ და მღვდელმთავრებმა ყველაზე მეტი სარგებელი მიიღეს და უმეტესი მათგანი "პირდაპირი ხაზით" აწვდიდა მრევლის აღსარებას იმდროინდელ "კუდ"-ს? განა მაშინ არ ამხედრდნენ ისინი იმ ჯიპებზე და მაშინ არ გავინდნენ "საკლესიო მომსახურეობის ზონიდან"?

რაც შეეხება ამ ძალმომრეობას და მუქარას, რომელსაც მეუფე იაკობი მოსალოდნელ სამთავრობო ცვლილებებთან დაკავშირებით აკეთებს, ეს არის შანტაჟი და საბოტაჟი ერთდროულად. მიხვდეს ახლა მაინც ხელისუფლება რატომ არის საშიში ამ ინსტიტუტისთვის გუნდრუკის კმევა დამაზიანებელი სახელმწიფოსთვის და სეკულარიზმის აბსოლუტური იგნორირება.

უფრო მეტიც - დედამიწაზე სულმდგმულთ შორის არ არსებობს აბსოლუტური ავტორიტეტი. ღმერთსაც კი ვსაყვედურებთ ხოლმე გააზრებული თუ გაუაზრებელი ფრაზით - რატომ ღმერთო, რატომ უფალო? ყველა უშვებს შეგნებულ და შეუგნებელ შეცდომებს. გავახსენო საპატრიარქოს, მის მიერ სიკვდილის შემდეგ ხარსისხში აღდგენილი მღვდელმთავრები, რომელთა დასაცავად სიტყვაც არ ამოუღით საბჭოთა რეჟიმის დროს? შეგნებული იყო ეს შეცდომები თუ შეუგნებელი? ასევეა მამალაძის შემთხვევაში - არსებობს უამრავი კითხვის ნიშანი და ჩვენ საზოგადოებას გვჭირდება ამაზე პასუხები. ამას მოითხოვს ქრისტეს სამართალიც. როდესაც მაცხოვარი ამბობს, ვინც მოინახულებს ტუსაღს მომინახულებს მეო, და არ აკონკრეტებს დანაშაულის ხარიხს, რატომ არის საჭირო თუნდაც დეკანოზ მამალაძის მოსანახულებლად სასულიერო პირების მხრიდან, ქორეპისკოპოსების და ახლა უკვე პატრიარქის კურთხევა საჭირო? რას მალავს საპატრიარქო ამ საქმეში?

ხატებს თავად ჩვენ ვანგრევთ - ამიტომ, როდესაც უმაღლეს საულიერო იერარქს - ეპისკოპოსს, მართალია გამორჩეულის, მაგრამ ხარისხში თანაბრის კრიტიკის უფლებას ართმევენ და სანაცვლოდ "კოლეგა" მას ანგარიშსწორებას ჰპირდება საჯაროდ, ეს ეწინააღმდეგება ყველა ქრისტიანულ სწავლებას. პეტრეს პრორუსულობაზე საუბარი კი გაღმა შეედავე გამოღმა შეგრჩებას კლასიკური მაგალითია. იაკობის აშშ-ში ვოიაჟი სულაც არ ადასტურებს მის პროდასავლურობას. მით უფრო პრორუსი მოსაყდრისა და ათობით რუსეთუმე მღვდელმსახურის პირობებში.

ამიტომ, როდესაც პატრიარქი ზურგს აქცევს მღვდლის საკითხის განხილვას და ხარისხით თანატოლს მისი "გამორჩეული" ავტორიტეტისა და რანგის გამო აბუჩად იგდებს, რა თქმა უნდა, ამით თავად ანგრებს მწყემსი კეთილის ხატს. უფრო მეტიც, ამით იგნორირებას უკეთებს საეკლესიო თანასწორობას და უგულვებელყობს საეკლესიო სამართალს.

ამიტომ, მეუფე პეტრეს მარგინალიზების მცდელობა -მისთვის "ნაციონალის" და პრორუსის იარლიყების მიკერებით მორიგი არაქრისტიანული აქტია და არაფერი აქვს საერთო არც საეკლესიო წესებთან და არც ქრისტიანულ სწავლებასთან. მხოლება კი ნამდვილად არის ქრისტიანული, მოსწონს ეს ვინმეს თუ არა.
და ბოლოს, ხელისუფლებამ (განსაკუთრებით), პოლიტიკურმა პარტიებმა, ენჯეობმა ამ კონკრეტულ ვითარებაში თავი უნდა შეიკავონ პროცესის ესკალაციისგან, მით უფრო "მაღალი და შეუვალი ავტორიტეტის" დაცვისგან და საკითხს სწორედ რომ საეკლესო და მორალურ პრიზმაში შეხედონ,“ - დაწერა გოჩა მირცხულავამ „ფეისბუქის“ პირად გვერდზე.