კომენტარი

მეც და ყველა ქალი, ვინც პოლიტიკაშია, ხშირად ხდება თავდასხმის ობიექტი - თამარ ჩუგოშვილი

ყველა ქალი, ვინც პოლიტიკის სფეროშია, ხშირად ხდება თავდასხმის ობიექტი, – განაცხადა პარლამენტის პირველმა ვიცე-სპიკერმა, თამარ ჩუგოშვილმა მუქარის შესახებ პრეზიდენტობის კანდიდატ სალომე ზურაბიშვილისა და სახალხო დამცველ ნინო ლომჯარიას განცხადებების კომენტირებისას.

მისი თქმით, საქართველოში ყველამ უნდა გააცნობიეროს, რომ აგრესია არ არის სწორი.

„საჯარო სივრცეში ქალების მიმართ არის ხოლმე განსაკუთრებული აგრესია. მეც და ყველა ქალი, ვინც პოლიტიკის სფეროშია, ხშირად ხდება თავდასხმების ობიექტი და განსაკუთრებით, როდესაც საპრეზიდენტო პოსტზე აქვს ადამიანს პრეტენზია, მაშინ როგორც ჩანს, იზრდება აგრესია. კონკრეტული ფაქტები არსებობს, რომ მხოლოდ აგრესიის გამოხატულება არ არის და სხვადასხვა გამონათქვამები კონკრეტულ მუქარაში გადადის. ამ ქვეყანაში ყველამ უნდა გავაცნობიეროთ, რომ ეს არის ძალიან არასწორი, ძალიან ცუდი“, – განაცხადა ჩუგოშვილმა.

მისივე თქმით, პოლიტიკურ განცხადებებში ყველამ უნდა დაგმოს აგრესია და ამას გაემიჯნოს.

„არ შეიძლება, როდესაც ვიღაც არ მოგწონს, არ ვეთანხმებით ან პოლიტიკურად გემოვნებაში არ ჯდება, მუქარაზე გადავიდეთ და ძალადობისკენ მოვუწოდებდეთ. ეს არ არის ნორმალური. ვფიქრობ, პოლიტიკურ განცხადებებში ყველამ უნდა დაგმოს და ყველა უნდა გაემიჯნოს ასეთ მოვლენებს. თუ მუქარა აღწევს იმ ხარისხს, რომ შეიძლება დაკვალიფიცირდეს, როგორც სისხლის სამართლის დანაშაული, მაშინ სამართალდამცავმა ორგანოებმა უნდა მოახდინონ რეაგირება. ქალების მიმართ აგრესია არის განსაკუთრებით მაღალი. ეს საკუთარ თავზეც გამომიცდია და ყველა ქალს გამოუცდია, ვინც რაღაც ფორმით საჯარო სივრცეშია. ეს უნდა დასრულდეს“, – განაცხადა თამარ ჩუგოშვილმა.

ცნობისთვის, პრეზიდენტობის დამოუკიდებელმა კანდიდატმა, სალომე ზურაბიშვილმა გუშინ ბრიფინგზე განაცხადა, რომ მას და მის შვილებს „ნაციონალურ მოძრაობასთან“ დაკავშირებული ყოფილი სამხედროები სიცოცხლის მოსპობით ემუქრებიან.

მოგვაინებით, სახალხო დამცველმა ნინო ლომჯარიამ „ფეისბუქის“ პირად გვერდზე დაწერა, რომ რამდენიმე თვის წინ მუქარის შემცველი შეტყობინებები მიიღო.

„მეც მემუქრებოდნენ შუბლის გახვრეტით, სნაიპერის ტყვიით, მუქარა და დაუსრულებელი შეტყობინენები ჩვეულებრივი პრაქტიკა გახდა.“

ნინო ლომჯარია დღის ბოლოს აღნიშნულ საკითხზე შინაგან საქმეთა სამინისტოს გენერალურ ინსპექციაში გამოკითხვაზე იმყოფებოდა.