მსოფლიო

მესამე მსოფლიო ომი, შესაძლოა, დღევანდელი ცივილიზაციის დასასრული იყოს - ვლადიმერ პუტინი

რუსეთის პრეზიდენტმა ვლადიმერ პუტინმა განაცხადა, რომ მესამე მსოფლიო ომი ცივილიზაციის დასასრულს გამოიწვევს. ამის შესახებ მან ცხელი ხაზის მეშვეობით მოსახლეობის შეკითხვებზე პასუხისას ისაუბრა.

პუტინმა ციტატად მოიყვანა ფიზიკოს- თეორეტიკოსის, ალბერტ აინშტანის სიტყვები: „არ ვიცი, რა საშუალებებით წარიმართება მესამე მსოფლიო ომი, მაგრამ მეოთხე მსოფლიო ომში ქვებითა და ჯოხებით იბრძოლებენ“.

„იმის გააზრებამ, რომ მესამე მსოფლიო ომი, შესაძლოა, დღევანდელი ცივილიზაციის დასასრული იყოს, უნდა შეგვაკავოს თანამედროვე ცივილიზაციისთვის უკიდურესი და ძალიან სახიფათო მოქმედებებისგან საერთაშორისო არენაზე“, -დასძინა პუტინმა.

მან აღნიშნა, რომ მეორე მსოფლიო ომის შემდეგ ლოკალური კონფლიქტების არსებობის მიუხედავად, არ წარმოქმნილა გლობალური შეტაკებები. პუტინის მტკიცებით, ურთიერთგანადგურების შიში აკავებს ზესახელმწიფოებს დაუფიქრებელი ნაბიჯებისგან.

პუტინი გამოეხმაურა დიდი ბრიტანეთის ქალაქ სოლსბერიში ГРУ-ის ყოფილი აგენტის სერგეი სკრიპალისა და მისი ქალიშვილი იულიას ქიმიური ნივთიერებით, ე.წ „ნოვიჩოკით“ მოწამვლას. რუსეთის პრეზიდენტის მტკიცებით, სკრიპალები არ მოწამლულან სამხედრო ნივთიერებით, წინააღმდეგ შემთხვევაში ისინი რამდენიმე წამში მოკვდებოდნენ. გარდა ამისა, მან ისურვა, რომ რუსულ მხარეს მიეცეს საშუალება, შეხვდეს თავის მოქალაქეებს და ჩაერთოს გამოძიებაში.

შეკითხვაზე, როდემდე გაგრძელდება დასავლეთის მიერ რუსეთის დადანაშაულება სხვადასხვა საკითხში, პუტინმა უპასუხა, რომ სანქციები და სხვა შემზღუდავი ზომები მიმართულია რუსეთის განვითარების შესაკავებლად.

„კი არ უნდა შეაკავო ვინმე, მათ შორის რუსეთი,არამედ ურთოერთობა მოაგვარო“,-აღნიშნა პუტინმა და დაამატა, რომ ასეთი მიდგომა პოზიტიური იქნება მსოფლიო ეკონომიკისთვის.

როგორც რუსული მედია წერს, წლევანდელ ცხელ ხაზზე 2 მილიონზე მეტი შეკითხვა მოვიდა.