მსოფლიო

მექსიკაში მიწისძვრის შედეგად გარდაცვლილთა რაოდენობა 286-მდე გაიზარდა

მექსიკაში 19 სექტემბერს მომხდარი მიწისძვრის შედეგად დაღუპულთა რიცხვი 286 ადამიანამდე გაიზარდა. ამის შესახებ ტვიტერის საკუთარ გვერდზე მექსიკის სამაშველო ეროვნული სამსახურის უფროსმა ლუის ფელიპე პუენტემ დაწერა.

გარდა ამისა, აშშ-ის ეროვნულმა გეოლოგიურმა სამსახურმა გაავრცელა ინფორმაცია, რომ წყნარ ოკეანეში, მექსიკის დასავლეთ სანაპიროსთან 5.5 მაგნიტუდის სიმძლავრის მიწისძვრა მოხდა. ეპიცენტრი ქალაქ სან ჰოსე დელ კაბოსგან დასავლთით 109 კილომეტრში, 10 კილომეტრის სიღრმეზე მდებარეობს.

შეგახსენებთ, სამი დღის წინ მექსიკაში 7.1 მაგნიტუდის სიმძლავრის მიწისძვრა მოხდა. სექტემბერში ეს იყო მეორე კატასტროფა, რომელსაც ხალხი შეეჭირა. 7 სექტემბრის 8.1 მაგნიტუდის სიმძლავრის ბიძგებს დაახლოებით 100 ადამიანის სიცოცხლე ემსხვერპლა.

20 სექტემბერს ქვეყანაში სამდღიანი გლოვა გამოცხადდა.

მაშველები ამ დრომდე ეძებენ ნანგრევებში მოყოლილ ადამიანებს.

19 სექტემბრის ბიძგები დაემთხვა 1985 წლის დამანგრეველი მიწისძვრის წლისთავს. მაშინდელ კატასტროფას 10 000 ადამიანის სიცოცხლე შეეწირა.

ანა მებურიშვილი