კომენტარი

მე ოთხშაბათსაც არ მივალ საკრებულოში, რადგან ამ შოუს არ უნდა მოჰყვეს გაგრძელება - დავით ნარმანია

ქალაქში უამრავი საქმე გვაქვს გასაკეთებელი და პოლიტიკური შოუსთვის არ მცალია, - ასე უპასუხა თბილისის მერმა დავით ნარმანიამ დედაქალაქის საკრებულოს ოპოზიციის მოთხოვნას იმასთან დაკავშირებით, რომ თბილისის მერი საკრებულოში ოთხშაბათს უნდა გამოცხადდეს.

დავით ნარმანიამ ხაზგასმით აღნიშნა, რომ ის თბილისის საკრებულოში მისვლას ოთხშაბათს არ გეგმავს.

მისივე თქმით, გუშინდელი დღე შედგა და ეს დღე შედგა “ქართული ოცნების” პოლიტიკური გუნდის ღირსეული გამარჯვებით.

“გუშინ პოლიტიკური შოუ არ შედგა და ჩვენმა უმრავლესობამ ღირსეულად უპასუხა მათ მიერ წამოწყებულ იმ ცალკეულ ცინიკურ საკითხებს, რაზეც ჩვენ ღირსეული პასუხი გვაქვს. ქმედებები, რაც ჩვენი მხრიდან განხორციელდა თავის დროზე, იყო კანონიერი ყველა წესისა და პროცედურის დაცვით. სწორედ ამიტომ, ამ ყველაფრის გაგრძელებას ცდილობენ, რომ ჩემი ძალით მისვლა მოხდეს საკრებულოში. თუმცა ხაზგასმით მინდა აღვნიშნო, რომ ვერ ეღირსებიან. მე ოთხშაბათსაც არ მივალ საკრებულოში, რადგან ამ შოუს არ უნდა მოჰყვეს გაგრძელება”, - განაცხადა დავით ნარმანიამ.

თბილისის საკრებულოს ოპოზიცია გუშინ, საკრებულოს სხდომაზე დავით ნარმანიას მისვლასა და მოსამართლე ნატა ნაზღაიძის ოჯახისთვის მილიონიანი ქონების გადაცემის საკითხზე მათთვის ახსნა-განმარტების მიცემას ითხოვდა. თბილისის მერი საკრებულოში არ მივიდა.

ნინო ექვთიმიშვილი