კომენტარი

მე მოვინანიე ჩემი დანაშაული - ზაზა ბაქრაძე ბუტა რობაქიძის მკვლელობის საქმეზე გამოტანილი განაჩენის შემდეგ

კრიმინალური პოლიციის ყოფილმა უფროსმა ზაზა ბაქრაძემ, რომელიც მოსამართლე დავით მგელიაშვილმა ბუტა რობაქიძის სიცოცხლის მოსპობის საქმეზე დამნაშავედ ცნო, განაცხადა, რომ მან დანაშაული მოინანია.

„მე მოვინანიე ჩემი დანაშაული“, - განაცხადა განაჩენის გამოცხადების შემდეგ ბაქრაძემ.

ბაქრაძე ერთადერთია ბუტა რობაქიძის მკვლელობის საქმეზე ბრალდებული შინაგან საქმეთა სამინისტროს ყოფილი მაღალჩინოსნებიდან, რომელიც არ დაუპატიმრებიათ. ზაზა ბაქრაძეს საპროცესო შეთანხმება გაუფორმდა და მას სასჯელის სახით განესაზღვრა პირობითი მსჯავრი 4 წლითა და 6 თვის ვადით, ასევე ჯარიმა 5 000 ლარის ოდენობით და 2 წლით ჩამოერთვა თანამდებობის დაკავების უფლება.

რაც შეეხება დანარჩენებს, გურამ დონაძეს სასჯელის სახით 5 წლითა და 3 თვით ვადით პატიმრობა მიესაჯა და აეკრძალა თანამდებობის დაკავება 2 წლითა და 3 თვის ვადით.

დავით იაშვილს სასჯელის სახით განესაზღვრა 5 წლითა და 3 თვის ვადით პატიმრობა და აეკრძალა თანამდებობის დაკავება 2 წლითა და 3 თვის ვადით.

ზურა მიქაძეს სასჯელის სახით 6 წლითა და 3 თვის თავისუფლების აღკვეთა განესაზღვრა, თანამდებობის დაკავება კი 2 წლითა და 3 თვის ვადით აეკრძალა.

ირაკლი ფირცხალავას სასჯელის სახით თავისუფლების აღკვეთა 5 წლითა და 3 თვის ვადით, ხოლო 2 წლითა და 3 თვის ვადით სახელმწიფო თანამდებობის დაკავება აეკრძალა.

გურამ დონაძე, ზურა მიქაძე და დავით იაშვილი სხდომათა დარბაზშივე დააკავეს, ირაკლი ფირცხალავა, როგორც ცნობილია, სხვა საქმეზე უკვე მსჯავრდებულია.

აღნიშნულ საქმეზე განაჩენის გამოცხადებას სასამართლო დარბაზში ხმაური და დაპირისპირება მოჰყვა. ბუტა რობაქიძის საქმის პროკურორს, დავით მეფარიძეს სანთებელა ესროლეს. მან თავის არეში მცირე დაზიანება მიიღო.

ბუტა რობაქიძე თბილისში 2004 წლის 23 ნოემბერს მოკლეს.