კომენტარი

მე კარგად ვიცი, რომ ელიტური კორუფცია ჩვენთან არ არის - მაია ცქიტიშვილი „ომეგა ჯგუფის“ საქმეზე გავრცელებულ მორიგ ჩანაწერზე

„ჩემი შეფასება ელიტურ კორუფციასთან დაკავშირებით არის იგივე. მე კარგად ვიცი, რომ ელიტური კორუფცია ჩვენთან არ არის“, - ასე გამოეხმაურა საქართველოს ვიცე-პრემიერი, რეგიონული განვითარებისა და ინფრასტრუქტურის მინისტრი მაია ცქიტიშვილი „ომეგა ჯგუფის“ საქმეზე გავრცელებულ მორიგ ჩანაწერს, რომელშიც, სავარაუდოდ, სპორტისა და ახალგაზრდობის ყოფილი მინისტრი ლევან ყიფიანი „ომეგა ჯგუფის“ დამფუძნებლებს მინისტრებისთვის ძვირადღირებულ მანქანებს სძალავდა.

ცქიტიშვილის თქმით, ჩანაწერის ავთენტურობა საგამოძიებო ორგანოებმა უნდა დაადგინონ.

„მოსაწყენია უკვე ამ კომენტარის გაცემა. გითხარით, ყველა კითხვასთან დაკავშირებით იქნება გამოძიება, ამ შემთხვევაში გასცემს პასუხს. რაც შეეხება, ბატონი ბიძინას ხსენებას, ქუმსიშვილის ხსენებას, ხადურის და ა.შ. ,ჯერჯერობით ჩვენ ვისმენთ უბრალოდ სხვადასხვა ადამიანის საუბარს მესამე პირში, მეათე პირში. მე პირადად არანაირი ეჭვები არ მაქვს, თუ ჩემი პოზიციას კითხულობთ“,- განაცხადა ცქიტიშვილმა.

შეგახსენებთ - „რუსთავი 2“-მა „ომეგა ჯგუფის“ საქმეზე მორიგი ფარული ჩანაწერი მოიპოვა, რომელშიც ისევ ფიგურირებს სპორტისა და ახალგაზრდობის ყოფილი მინისტრი ლევან ყიფიანი.

აღნიშნულ ჩანაწერში, რომლის ავთენტურობაში „კურიერი“ ამ ეტაპზე დარწმუნებით ვერ საუბრობს, ირკვევა, რომ ყიფიანი „ომეგა ჯგუფის“ დამფუძნებლებს მინისტრებისთვის ძვირადღირებულ მანქანებს სძალავდა.

ამ ჩანაწერში ყიფიანი „ომეგა ჯგუფის“ მენეჯმენტის წარმომადგენლებისგან ორი ყოფილი მინისტრისთვის - ნოდარ ხადურისა და დიმიტრი ქუმსიშვილისთვის 3 მანქანის - მინი კუპერის, X 4-სა და X 5-ს გადაფორმებას ითხოვს.

ყიფიანი აღნიშნულ მოთხოვნას ხსნის ფინანსური ვალდებულებებით, რომლებსაც ის ვერ გაექცევა.