კომენტარი

მე ამ საქმეს შევაფასებდი ხალხის ფულის ჭამის საქმედ - ლევან მახაშვილი

დღეს კიდევ ერთხელ სასამართლოთიც დადასტურდა, რომ იმ ადამიანმა, რომელიც თავის დროზე ხელისუფლებაში კორუფციის დამარცხების ეგიდით მოვიდა, საქმე ხალხის ფულის ჭამით დაასრულა, – ამის შესახებ საქართველოს პარლამენტის ევროინტეგრაციის კომიტეტის თავმჯდომე ლევან მახაშვილმა განაცხადა.

„ჩვენ რაც ვნახეთ, არის 9 მილიონის, ხალხის ფულის გაფლანგვა, ხალხის ფულის ჭამა. ეს არის და ეს. ფაქტია, სასამართლოზე დადასტურდა, რომ 9 მილიონი, ხალხის ფული იყო გაფლანგული ისეთ საკითხებზე, რომელიც საერთოდ არაფერ შუაში იყო, არც მის წარმომადგენლობასთან, არც რაიმე ტიპის სახელმწიფო უფლებამოსილების განხორციელებასთან. თანხები პირდაპირ იხარჯებოდა მის გახდომაზე, მისი თმის მოვლაში და ა.შ. საზოგადოებამ კარგად ნახა ეს, სასამართლო პროცესები საჯარო იყო და დეტალები ვნახეთ. მე ამ საქმეს შევაფასებდი ხალხის ფულის ჭამის საქმედ“, – განაცხადა ლევან მახაშვილმა.

სასამართლომ დიდი ოდენობით საბიუჯეტო სახსრების გაფლანგვის საქმეზე დღეს განაჩენი გამოაცხადა. სასამართლოს გადაწყვეტილებით, აღნიშნულ საქმეზე მიხეილ სააკაშვილს ცხრა წლით თავისუფლების აღკვეთა მიესაჯა, თემურ ჯანაშიას კი, 300 ათასი ლარით ჯარიმა განესაზღვრა.