მსოფლიო

მათ მე გამომაძევეს, მაგრამ ყველა თქვენგანს ვერ გამოაძევებენ - მიხეილ სააკაშვილ ი (ვიდეო)

უკრაინიდან გაძევებულმა მიხეილ სააკაშვილმა უკრაინის მთავრობის გადადგომის მოთხოვნით ახალი მსვლელობა დააანონსა, რომელიც ხვალ კიევსა და ქვეყნის სხვა ქალაქებშიც გაიმართება. მან ფეისბუკზე განთავსებული ვიდეოს საშუალებით ხალხს აქციაზე მისვლისკენ მოუწოდა.

„ჩვენ მშვიდობიანად უნდა შევცვალოთ ხელისუფლება და დავამყაროთ ქვეყანაში წესრიგი, ჩვენ მოსახლეობას ალტერნატივა და პოზიტიური პროგრამა უნდა შევთავაზოთ იმისთვის, რომ უკრაინა უკეთესობისკენ შეიცვალოს, ამისთვის ჩვენ ბევრნი უნდა ვიყოთ, არ უნდა დავიღალოთ და ხელები არ უნდა ჩამოვუშვათ, მე სწორედ ამის გამო გამომაგდეს, რომ ყველაზე მეტად მასობრივი, სამოქალაქო პროტესტის ეშინიათ, ხვალ უკრაინის ბევრ ქალაქში გამოვა ხალხი, კიევშიც აქცია ტრადიციულად შევჩენკოს პარკში 12:00 საათზე იქნება. მე ველოდები იმ მომენტს, როდესაც თქვენთან შეერთებას შევძლებ, მაგრამ დღეს მოგიწოდებთ, არ მიიღოთ მათი თამაშის წესები, მათ მე გამომაძევეს, მაგრამ ყველა თქვენგანს ვერ გამოაძევებენ, ისინი ვერ შეძლებენ თქვენს შეშინებას და გაჩერებას. ჩვენ ყველაფერი გამოგვივა. მომავალ შეხვედრამდე“, - განაცხადა სააკაშვილმა ამსტერდამიდან გადაღებულ ვიდეომიმართვაში.

12 თებერვალს სპეცრაზმელთა ჯგუფმა სააკაშვილი კიევში, რესტორან „სულგუნში“ დააკავა. შემდეგ ოდესის ექს-გუბერნატორი კერძო თვითმფრინავით პოლონეთში გადაიყვანეს „რეადმისიასთან“ [არალეგალის იმ ქვეყანაში დაბრუნება, საიდანაც ის არალეგალურად შევიდა სხვა სახელმწიფოში] დაკავშირებული განცხადების მიხედვით, რომელიც პოლონურ მხარეს უკრაინის ეროვნულმა საიმიგრაციო სამსახურმა მიაწოდა.

ამჟამად სააკაშვილი ჰოლანდიაში იმყოფება.