მსოფლიო

მასშტაბური ხანძარი უკრაინაში - დაშავდა 2 ადამიანი, ევაკუირებულია დაახლოებით 30 000 ადამიანი

უკრაინაში, დასახლებულ პუნქტ კალინოვკაში, ქალაქ ვინიციდან 20 კილომეტრში იარაღის საწყობი აფეთქდა.

ხანძრის შედეგად 2 ადამიანი დაშავდა. როგორც ტელეკომპანია 112 Украина-ის ეთერში ვინიცის საოლქო ადმინისტრაციის უფროსის მოადგილემ ანდრეი გიჟკომ განაცხადა, მათ სერიოზული ტრავმები არ აღენიშნებათ.

„ორმა ქალბატონმა მიმართა სამედიცინო დახმარების თხოვნით, მძიმე ტრავმები არაა“, -აღნიშნა გიჟკომ.

კალინოვკის რაიონიდან 28.300 ადამიანია ევაკუირებული, საავადმყოფოებიდან 180 პაციენტი გაიყვანეს.

ვინიცის რაიონიდან 1366 ადამიანის ევაკუაცია მოახდინეს. ხალხს ანაწილებენ ვინიცის რაიონულ საავადმყოფოში და საოლქო სკოლებში.

მომხდარის გამო შეიცვალა 14 მატარებლის მარშრუტი, ასევე ევაკუირებულია 4 სარკინიგზო ხაზის თანამშრომლები.

უკრაინის საგანგებო სიტუაციათა სახელმწიფო სამსახურმა 4 საცხოვრებელ სახლში ხანძრის ლიკვიდირება მოახერხა.

უკრაინის შეიარაღებული ძალების გენშტაბის ინფორმაციით, ხანძარი მოედო საწყობის 10 %-ს, ხოლო ცეცხლის გავრცელების ტერიტორიის ნახევარში საბრძოლო მასალა არ ინახება.

შეიარაღებული ძალების გენშტაბის საზოგადოებასთან ურთიერთობის დეპარტამენტის ხელმძღვანელმა ბოგდან სენიკამ განაცხადა, რომ არ გამორიცხავენ დივერსიის შესაძლებლობას.

გადაკეტილია ვინიცა-ჟიტომირი-კიევის ტრასა. მაშველების ინფორმაციით, ეს იმისთვის გაკეთდა, რომ არ იყოს დაშვებული მანქანების თავმოყრა.

ხანძარი გუშინ, კიევის დროით საღამოს 9 საათზე გაჩნდა. ადგილზე მობილიზებულია ვინიცის, ჟიტომირისა და ხმელნიცკის ოლქების სამართალდამცველები.

არსებული ინფორმაციით, აღნიშნულ სამხედრო საწყობში 188 ათასი ტონა საბრძოლო მასალა ინახება. არსენალი 60 ჰექტარ ფართობზეა გაშლილი. საბრძოლო იარაღს შორის არის რაკეტები „სმერჩი“, „ურაგანი“ და „გრადი“.

ხანძრის ჩაქრობის ოპერაციაში ჩართულია 691 ადამიანი და 149 ცალი ტექნიკა.

ანა მებურიშვილი