მსოფლიო

მარინ ლე პენი აშშ-ის გადაწყვეტილებას უკრაინის დახმარების შეჩერების შესახებ „ბრუტალურად“ მიიჩნევს

ფრანგი პოლიტიკოსი მარინ ლე პენი მკაცრად აკრიტიკებს აშშ-ის გადაწყვეტილებას უკრაინისთვის სამხედრო დახმარების შეჩერების თაობაზე. როგორც მან გამოცემა Le Figaro-ს განუცხადა, ამ ნაბიჯს უხეში, დაუნდობელი უწოდა და აღნიშნა, რომ ეს “მოულოდნელი და უკიდურესად მძიმეა უკრაინისთვის, განსაკუთრებით იმ ჯარისკაცებისთვის, რომლებიც ქვეყნის დაცვაში არიან ჩართულნი”.

ფრანგული მედიის ინფორმაციით, ლე პენის განცხადება მნიშვნელოვან ტონალურ ცვლილებას წარმოადგენს მისი პოლიტიკური კურსისთვის. გასულ კვირას, საფრანგეთის პარლამენტში უკრაინასთან დაკავშირებულ დებატებში, მას დონალდ ტრამპი არ უხსენებია. თუმცა, შაბათს, სოფლის მეურნეობის გამოფენაზე, მან თავი შეიკავა უკრაინის პრეზიდენტის, ვოლოდიმირ ზელენსკისა და ტრამპის დაპირისპირებაზე კომენტარისგან.

მარინ ლე პენი, რომელიც Rassemblement National-ის (ეროვნული გაერთიანება) ლიდერია და 2027 წლის საპრეზიდენტო არჩევნების კანდიდატად მიიჩნევა, ბოლო პერიოდში საგარეო პოლიტიკის საკითხებში შედარებით დაბალანსებულ პოზიციას იკავებს. მისი განცხადებები შეიძლება მიუთითებდეს, რომ ის ცდილობს, თანდათან დააშოროს საკუთარი იმიჯი ტრამპის ადმინისტრაციის პოლიტიკას, განსაკუთრებით ევროპაში მიმდინარე კონფლიქტების მიმართ.