კომენტარი

მარიხუანას კულტივაციის თემა არ განიხილება და ამაზე შფოთვა უადგილოა - ნათია მეზვრიშვილი

შინაგან საქმეთა მინისტრის მოადგილის, ნათია მეზვრიშვილის განცხადებით, მარიხუანას კულტივაციასთან დაკავშირებით არაერთხელ გაკეთდა განცხადება, რომ განხილვა განუსაზღვრელი ვადით გადადებულია.

მისივე თქმით, მარიხუანას კულტივაციის თემა არ განიხილება და ამაზე შფოთვა უადგილოა.

„რაც შეეხება კულტივაციას, ამასთან დაკავშირებით არაერთხელ გაკეთდა განცხადება, რომ განხილვა გადადებულია განუსაზღვრელი ვადით. არც გუშინდელი კომიტეტის სხდომებზე და არც დღეს ეს არ განიხილება. რაც შეეხება კანონპროექტის გაწვევას, გასაგებია, ოთხმა დპუტატმა ეს საკითხი წამოაყენა, მაგრამ გაწვევას აქვს თავისი პროცედურები და ეს კარგად იციან მათაც და მთავრობის წევრებმაც.

კანონპროექტის ავტორი არის მთვრობა და თუ მიიღებს გადაწყვეტილებას, რომ ეს კანონპროექტი იყოს გაწვეული, იქნება გაწვეული. განხილვის საკითხი დღის წესრიგში არ დგას და ეს შფოთვა არის უადგილო. პარლამენტში მოსული ვარ იმისთვის, რომ მოხმარებასთან დაკავშირებით კანონპროექტი გამოვიტანო პლენარულ სხდომაზე მეორე მოსმენით“, – აცხადებს ნათია მეზვრიშვილი.