კომენტარი

მაქვს საფუძველი ვიფიქრო, რომ ჩემი ძმის სახლში ჩატარებული ჩხრეკა ჩემს საქმიანობას უკავშირდება - ნონა წოწორია

სტრასბურგის ადამიანის უფლებათა დაცვის სასამართლოს მოსამართლე ნონა წოწორია, მისი ძმის, ოთარ წოწორიას სახლში გუშინ ჩატარებულ ჩხრეკასთან დაკავშირებით განცხადებას Facebook-ის პირად გვერდზე ავრცელებს.

როგორც ნონა წოწორია განცხადებაში ამბობს, მას აქვს საფუძველი იფიქროს, რომ აღნიშნული ქმედებები უკავშირდება მის საქმიანობას ადამიანის უფლებათა და თავისუფლებათა დაცვის ევროპულ სასამართლოში.

„მაღალი საზოგადოებრივი ინტერესის გათვალისწინებით, ა.წ. 18 მაისს განვითარებულ მოვლენებთან დაკავშირებით თავს ვალდებულად მივიჩნევ განვაცხადო შემდეგი:

18 მაისს, დაახლოებით 19 საათზე, კრიმინალური პოლიციის თანამშრომლებმა ჩხრეკა ჩაატარეს ქ. ბათუმში ჩემი ოჯახის კუთვნილ სახლში, სადაც ცხოვრობენ ჩემი ძმა, რძალი და ძმისშვილები. შინაგან საქმეთა სამინისტროს განცხადებით, ამოღებულია პისტოლეტი და ვაზნები. ამ ნივთების წარმომავლობა ჩვენთვის უცნობია და შესაბამისად, ისინი არ წარმოადგენენ ჩემი ძმის ან ჩემი ოჯახის რომელიმე სხვა წევრის საკუთრებას. აქვე აღვნიშნავ, რომ ჩემს ძმას არასდროს ჰქონია კანონთან რამე პრობლემა და არ არის ნასამართლევი. ჩემი ოჯახისთვის თავისუფლება, პატიოსნება, შრომისმოყვარეობა და კანონმორჩილება ყოველთვის იყო, არის და იქნება მთავარი ღირებულებები.

მაქვს საფუძველი ვიფიქრო, რომ აღნიშნული ქმედებები უკავშირდება ჩემს საქმიანობას ადამიანის უფლებათა და თავისუფლებათა დაცვის ევროპულ სასამართლოში. მსურს განვაცხადო, რომ ვერაფერი მოახდენს გავლენას ჩემს მიერ სამოსამართლეო ფუნქციების განხორციელებაზე და კვლავაც შევიტან წვლილს საქართველოში დემოკრატიის და ადამიანის უფლებების განმტკიცების საქმეში“, - ნათქვამია განცხადებაში.

მონიკა დავლიანიძე