კომენტარი

მანქანით, რომელიც დაიწვა, თამაზ მეჭიაურიც აპირებდა წამოსვლას - ნანა კაკაბაძე

უფლებადამცველ ნანა კაკაბაძის განცხადებით, მისი ორგანიზაციის "ყოფილი პოლიტპატიმრები ადამიანის უფლებებისათვის" წარმომადგენლები, მახარე სისაური და რამაზ ღვალაძე ვარაუდობენ, რომ მათ მანქანას "მოლოტოვის კოქტეული" ესროლეს.

როგორც ნანა კაკაბაძემ დღეს გამართულ პრესკონფერენციაზე განაცხადა, აღნიშნული საკითხი გასაჩივრდება.

"როგორც თვითონ ამბობენ, ისინი მეჭიაურის ოფისში მივიდნენ, ამ მანქანით თამაზ მეჭიაურიც აპირებდა წამოსვლას, უნდა გამოყოლოდა მათ. მიდიოდნენ არჩევნებთან, გასაჩივრების საკითხებთან დაკავშირებით უნდა ენახათ იურისტები. მეჭიაურს უთქვამს, მე ვერ წამოვალო. ისინი მარტო წამოვიდნენ ოფისიდან. წამოსვლიდან რამდენიმე წუთში მოხდა ინციდენტი. თვითონ ვარაუდობენ, რომ ეს იყო "მოლოტოვის კოქტეილი", რომელიც მანქანას ესროლეს გაურკვეველმა პირებმა. ჯერ სთხოვეს გაჩერება - ხელი დაუქნიეს, ამათმა არ იცოდნენ ვინ იყო. ჩათვალეს, იქნებ არჩევნებთან დაკავშირებით, კომისიის წევრები არიანო და გააჩერეს მანქანა. ამის შემდეგ ესროლეს "მოლოტოვის კოქტეილი". საბედნიეროდ, შიგნით ვერ შევარდა და გარედან წაეკიდა ცეცხლი მანქანას. ისინი გადარჩენილები არიან, ცოცხლები არიან.

სავარაუდოდ, ეს არის არჩევნებთან დაკავშირებული. რა თქმა უნდა, მოვითხოვთ ამის გამოძიებას, როგორც არჩევნების თანმხლები მოვლენის", - განაცხადა კაკაბაძემ.

მისი თქმით, აღნიშნულ საკითხთან დაკავშირებით ახალგაზრდა იურისტთა ასოციაციას უკვე მიმართეს.

როგორც კაკაბაძე ამბობს, მახარე სისაური და რამაზ ღვალაძე მისი ორგანიზაციის ის წარმომადგენლები არიან, რომლებიც ციხიდან პოლიტპატიმრის სტატუსით გათავისუფლდნენ.

"ისინი "ყინწვისის საქმის" პოლიტპატიმრები არიან. მახარე თვითონ დუშელია და მეჭიაური ეტყობა დაუკავშირდა, როგორც ადგილობრივ მკვიდრს და როგორც აქტიურ ადამიანს და ყველაზე უფრო ცნობად სახეს იმ რაიონში. აქედან გამომდინარე, ისინი ჩაერთვნენ პროცესში. ჩაერთნენ დამკვირვებლებად, არც ერთ მხარეს არ წარმოადგენდნენ. მათ ჩათვალეს, რომ მეჭიაურის მხარე იყო დაჩაგრულ მდგომარეობაში", - განაცხადა კაკაბაძემ.

ცნობისათვის, თიანეთის მერობის კანდიდატ თამაზ მეჭიაურის განცხადებით, იმ არასამთავრობო ორგანიზაციის ორ წარმომადგენელს, რომლებიც თიანეთში საარჩევნო პროცესებს ესწრებოდნენ, ჟინვალის გზაზე თავს დაესხნან და მანქანა დაუწვეს.

ავტომობილის დაწვის ფაქტი „მედიანიუსს“ შინაგან საქმეთა სამინისტროში დაუდასტურეს.

უწყებაში ამბობენ, რომ მიმდინარეობს საგამოძიებო მოქმედებები და ექსტერტიზა, რათა დადგინდეს, რა გახდა ავტომობილის დაწვის მიზეზი.

შსს-ს ინფორმაციით, მოხდართან დაკავშირებით საქმე აღძრულია სისხლის სამართლის კოდექსის 187 მუხლის მე-2 ნაწილით, რაც გულისხმობს სხვისი ნივთის დაზიანებას ან განადგურებას, ჩადენილს ცეცხლის წაკიდებით, აფეთქებით ან სხვა საყოველთაოდ საშიში საშუალებით.

ნინო ექვთიმიშვილი