კომენტარი

მამა გიორგის და მის ადვოკატებს უნდა მიეცეთ შესაძლებლობა თავის სიმართლე გააცნონ საზოგადოებას - გიორგი მარგველაშვილი

პრეზიდენტ გიორგი მარგველაშვილის განცხადებით, ე.წ. ციანიდის საქმესთან დაკავშირებით უდანაშაულობის პრეზუმფცია დარღვეულია.

როგორც ქვეყნის პირველმა პირმა ჟურნალისტებს საპატრიარქოში გამართული შეხვედრის შემდეგ განუცხადა, საქმესთან დაკავშირებით პატრიარქი ინფორმირებულია ყველა მხრიდან.

,,დღეს შეჯიბრებითობა და უდანაშაულობის პრეზუმფცია დარღვეულია საქართველოში და მამა გიორგის და მის ადვოკატებს უნდა მიეცეთ შესაძლებლობა თავის სიმართლე გააცნონ საზოგადოებას, რადგან ჩვენ ყველანი ამაზე ვსაუბრობთ. ამ პროცესით ჩვენ გადავლახავთ არსებულ სირთულეებს და მივალთ ჭეშმარიტ პასუხებამდე.

პატრიარქი ჩართული არის ყველა რთული საკითხის განხილვაში და ჩართული არის სრული ღიაობით სინოდისგან. იქ ყველას აქვს შესაძლებლობა ძალიან ღიად და ცივილიზებულად დააფიქსიროს თავის პოზიცია. ეს არის დიალოგი, რომელიშიც პატრიარქი იღებს ინფორმაციას ყველა მხრიდან’’, - განუცხადა ჟურნალისტებს გიორგი მარგველაშვილმა.

მისი თქმით, დღეს არის ვითარება, როდესაც დაცვის მხარე არის შეზღუდული თავისი პოზიციის დაფიქსირებაში.

"დღეს არის ვითარება, როდესაც ერთი მხარე, რომლის თაობაზე კომენტარს აკეთებენ როგორც პოლიტიკოსები, ასევე სამართალდამცავები, არის შეზღუდული თავისი პოზიციის დაფიქსირებაში. ესეთი რამე შესაძლებელია მოხდეს, მაგრამ მაშინ ეს საკითხი არ უნდა იყოს საჯარო განხილვის საკითხი, როდესაც მთელი ქვეყანა საუბრობს ამ საქმეზე და მეორე მხარეს, თუნდაც თავისი წილი დანაშულის ან უდანაშაულობის მტკიცების შესაძლებლობა არ აქვს. ეს არის შეჯიბრებითობის და უდანაშაულობის პრეზუმციის დარღვევა,.

მე გამოძიების დეტალებში არ შევდივარ, არ ვარ არც პროკურორი, არც გამომძიებელი, არც მოსამართლე, მაგრამ პოლიტიკურად მოგახსენებთ, რომ ეს არის არაჯანმრთელი სიტუაცია, როდესაც ერთი მხარე საუბრობს და მეორეს არ აქვს თავისი პოზიციის დაფიქსირების შესაძლებლობა,“- განაცხადა გიორგი მარგველაშვილმა.

ნინო ექვთიმიშვილი