კომენტარი

მაიას პრაქტიკულად კლავენ - ვახტანგ რჩეულიშვილი

სამშენებლო კომპანია ცენტრ „პოინტის“ დამფუძნებლის მაია რჩეულიშვილის მეუღლის, ვახტანგ რჩეულიშვილის განცხადებით, მაია რჩეულიშვილი ერთი მხრივ, ინფარქტის შემდეგ გულის სტენდირებას საჭიროებს და მეორე მხრივ, ახლად წარმოქნილი პრობლემის გამოკვლევას, რაც ციხეში ვერ მოხერხდება.

ამის შესახებ რჩეულიშვილმა მედიას განუცხადა.

„აქ არის ერთი, რომ ნაინფარქტებია და გულის სტენდირებას მოითხოვს, მეორე კი, იმ ახლად წარმოქმნილის გამოკვლევას. ვერც ერთი გამოკვლევა ციხეში ვერ ჩატარდება. პროკურატურა მოითხოვს ამის საწინააღმდეგოს. რამდენად წინასწარ განზრახვით არ ვიცი, მაგრამ პრაქტიკულად კლავენ“,-აღნიშნა ვახტანგ რჩეულიშვილმა.

საკითხის კომენტირებისას, უნდა შეეცვალოს თუ არა მაია რჩეულიშვილს აღკვეთის ღონისძიება გირაოთი, პარლამენტის იურიდულ საკითხთა კომიტეტის თავმჯდომარემ ეკა ბესელიამ აღნიშნა, რომ „სასამათლო პროცესის დროს პოლიტიკური პირების მხრიდან რაიმე ტიპის მითითებების მიცემა არის პირდაპირი ჩარევა სასამართლო საქმიანობაში და ისჯება კანონით“.

„ამიტომ, არსებობს ქვეყანაში დამოუკიდებელი მართლმსაჯულება, რომ მან მიიღოს სამართლიანი გადაწყვეტილება, რომლითაც უნდა გაითვალისწინოს პირის ნებისმიერი მდგომარეობა, მათ შორის ჯანმრთელობის. მე სხვა კომენტარს ვერ გავაკეთებ“,-აღნიშნა ბესელიამ.

მაია რჩეულიშვილი 13 დეკემბერს ჯანმრთელობის გაუარესების გამო ჩაფიძის გულის კლინიკაში გადაიყვანეს.

მონიკა დავლიანიძე