კომენტარი

მაია ცქიტიშვილი ოთარ ფარცხალაძეზე - არ გამოვრიცხავ არც დაპატიმრებას, არც სასჯელის სხვა ქმედების შეფარდებას

არ გამოვრიცხავ არც დაპატიმრებას, არც სასჯელის სხვა ქმედებების შეფარდებას, მაგრამ ამ ნაწილში ისევ და ისევ სასამართლომ უნდა იმსჯელოს, - განუცხადა ჟურნალისტებს რეგიონული განვითარებისა და ინფრასტრუქტურის მინისტრმა მაია ცქიტიშვილმა შეკითხვის საპასუხოდ, ხომ არ უკავშირდებოდა ოთარ ფარცხალაძისთვის ბრალის წარდგენა წინასაარჩევნო პერიოდს.

მაია ცქიტიშვილის თქმით, შეკითხვებზე, რომელიც საზოგადოებაში ჩნდება, სწორედ გამოძიებამ უნდა უპასუხოს.

„გამოძიება გასცემს ამ შეკითხვებს პასუხს და შესაბამისად, ის პროცედურები, რომელიც ამ პერიოდის განმავლობაში იყო საჭირო, რომ ბრალი იმ სტანდარტით წარდგენილიყო, რა სტანდარტზეც არაერთხელ გვისაუბრია, ეს მომენტი დადგა დღეს, რასთანაც არის დაკავშირებული სწორედ დღეს სასამართლოში ბრალის წარდგენის საკითხი. არ გამოვრიცხავ არც დაპატიმრებას, არც სასჯელის სხვა ქმედებების შეფარდებას, მაგრამ ამ ნაწილშიც ისევ და ისევ სასამართლომ უნდა იმსჯელოს და ჩვენ გვაქვს სხვადასხვა შემთხვევა, როდესაც პროკურატურის წარდგინებას სასამართლო არ დათანხმებია. მართლმსაჯულების პრინციპია, რომ პროკურატურა და საგამოძიებო ორგანოები მუშაობენ იმისთვის, რომ სასამართლოსთვის მისაღები სტანდარტით წარუდგინონ ბრალი და დაამტკიცონ. სასამართლოს უფლებამოსილება და ვალდებულებაა, განიხილოს ყველა წარდგენილი არგუმენტი და ამა თუ იმ ადამიანის ბრალეულობასთან დაკავშირებით იმსჯელოს, მანამდე, ალბათ, უდანაშაულობის პრეზუმფცია ყველამ უნდა დავიცვათ”,- აღნიშნა მან.

ოთარ ფარცხალაძეს ბრალი ყოფილი მთავარი აუდიტორის, ლაშა თორდიას ცემის საქმეზე წარედგინა.