მსოფლიო

ლუგარის ცენტრში აშშ ბიოლოგიურ იარაღს არ ქმნის, ეს საერთოდ აშშ-ს ობიექტი არაა - აშშ-ის თავდაცვის სამინისტროს წარმომადგენელი

აშშ-ის თავდაცვის სამინისტროს ოფიციალურმა წარმომადგენელმა ერიკ პაჰონმა აბსურდული უწოდა საქართველოს სახელმწიფო უსაფრთხოების ყოფილი მინისტრის, იგორ გიორგაძის ბრალდებას აშშ-ის მიერ საქართველოში ხალხზე საიდუმლო ექსპერიმენტების ჩატარების შესახებ. ამის შესახებ პაჰონმა რუსულ „რია ნოვოსტის“ განუცხადა.

„ბრალდებები, რომლებიც გაჟღერდა, აბსოლუტურად აბსურდულია. ლუგარის ცენტრში აშშ ბიოლოგიურ იარაღს არ ქმნის. ეს საერთოდ აშშ-ს ობიექტი არაა“, - განაცხადა პაჰონმა.

მან აღნიშნა, რომ რიჩარდ ლუგარის სახელობის საზოგადოებრივი ჯანმრთელობის კვლევითი ცენტრი ეკუთვნის და იმართება საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ.

„ლუგარის ცენტრის მისია მოქალაქეების ბიოლოგიური საფრთხისგან დაცვა, ინფექციური დაავადებების აღმოჩენის გზით ადამიანებისა და ცხოველების ჯანდაცვის მხარდაჭერა, საქართველოს, კავკასიისა და მსოფლიოს ინტერესებიდან გამომდინარე ეპიდემიოლოგიური ზედამხედველობა და კვლევების ხელშეწყობაა“, - აღნიშნა პაჰონმა.