მსოფლიო

ლონდონის ტერაქტის მოწყობაში ეჭვმიტანილი 18 წლის პირი დააკავეს

ლონდონის მეტროსადგურ „პერსონს გრინში“ მომხდარი ტერაქტის მოწყობაში ეჭვმიტანილი დააკავეს. ბიბისის ინფრორმაციით, ის 18 წლის კაცია, რომელიც პოლიციამ საპორტო ქალაქ დუვრში მიაგნო.

მიუხედავად ამისა, დიდ ბრიტანეთში ტერორიზმის საფრთხის დონე უმაღლეს ნიშნულზეა შენარჩუნებული.

თვითნაკეთი ბომბი, რომელიც პოლიეთილენის პარკში გახვეულ თეთრ სათლში იყო დამონტაჟებული, გუშინ აფეთქდა. გამომძიებლების თქმით, მოწყობილობას ტაიმერი ჰქონდა. ბიბისის მონაცემებით, აფეთქების გამო 30 ადამიანი დაშავდა.

მომხდარმა ტერორისტული აქტის კვალიფიკაცია მიიღო, რომელზეც პასუხისმგებლობა ტერორისტულმა ორგანიზაციამ „ისლამურმა სახელმწიფომ“ აიღო.

წელს ბრიტანეთში ეს უკვე მეხუთე ტერორისტული აქტია. წინა თავდასხმების შედეგად 36 ადამიანი დაიღუპა. 2005 წელს 52 ადამიანი დაიღუპა ლონდონის მეტროს სამ მატარებელსა და ავტობუსში თვითმკვლელთა ბომბების ამოქმედების გამო.

ანა მებურიშვილი