მსოფლიო

ლონდონი ცეცხლს ეთამაშება - რუსეთის წარმოამდგენელი გაეროში

გაეროში რუსეთის მუდმივმა წარმომადგენელმა ვასილი ნებენზიამ გააფრთხილა დიდი ბრიტანეთი, რომ ის „ცეცხლს ეთამაშება“, როცა მოსკოვს ადანაშაულებს ყოფილი ორმაგი აგენტის, სერგეი სკრიპალისა და მისი ქალიშვილის მოწამვლაში.

ნებენზიას თქმით, რუსეთი ყოველგვარი მტკიცებულებების გარეშე დაადანაშაულეს.

მან ასევე უკმაყოფილება გამოთქვა, რომ გონზე მისულ იულია სკრიპალთან, რომელიც არის რუსეთის მოქალაქე, არ უშვებენ რუსეთის კონსულს.

ნებენზიას თქმით, ლონდონმა რუსეთთან თანამშრომლობაზე უარს ამბობს, არ რთავს რუს გამომძიებლებს გამოძიებაში და მოსკოვს ინფორმაციას არ აწვდის. გარდა ამისა, მან დიდი ბრიტანეთი დაადანაშაულა, რომ სწორედ მის გამო გაუფუჭდა მოსკოვს ურთიერთობა დასავლეთის ქვეყნებთან.

რუსმა დიპლომატმა განაცხადა, რომ ლონდონმა „ყალბი ისტორია“ მოიგონა. მან აღნიშნა, რომ ნოვიჩოკი დასავლეთში გამოიგონეს.

„ნოვიჩოკი არაა რუსული კოპირაიტი. ეს სახელწოდება დასავლეთშია მოფიქრებული სამხედრო მომწამვლელი ნივთიერების ხაზისთვის“, -თქვა ნებენზიამ.

მან დასავლური მედიის რეაქცია სკრიპალის საქმეზე ფაშისტური პროპაგანდის ტაქტიკას შეადარა.

„რადგან ბრიტანეთის ხელისუფლება აქვს თავხედობა, უსირცხვილოდ განაცხადოს, რომ სოლსბერის ინციდენტის უკან დიდი ალბათობით რუსეთი დგას, ჩვენ ამავე ალბათობით ვარაუდობთ, რომ ამ მეგაპროვოკაციის უკან დგანან რამდენიმე ქვეყნის სპეცსამსახურები“, - დაასკვნა ნებენზიამ.

სკრიპალი და მისი ქალიშვილი 4 მარტს მოწამლეს ბრიტანეთის ქალაქ სოლსბერიში. გარდა ამისა დაშავდა 20-მდე სამოქალაქო პირი და პოლიციელი. როგორც დადგინდა, სკრიპალის მოსაწამლად რუსეთში გამზადებული ნერვო-პარალეპტიკური გაზი სახელწოდებით - ნოვიჩოკი გამოიყენეს.

მოწამვლაში ლონდონი რუსეთს ადანაშაულებს, რის გამოც დასავლეთმა 100-ზე მეტი რუსი დიპლომატი გააძევა.

აშშ-მ ორშაბათს მიიღო გადაწყვეტილება, რომლის მიხედვით, ქვეყანას 60 რუსი დიპლომატი დატოვებს, მას შეუერთდნენ გერმანია, უკრაინა, დანია, საფრანგეთი, ჩეხეთი, ლატვია, ესტონეთი, ლიტვა, იტალია, კანადა, ჰოლანდია, რუმინეთი, ფინეთი, ესპანეთი და ა.შ.