მსოფლიო

ლიეტუვის პრეზიდენტმა ქვეყანაში რუსეთის შეჭრა არ გამორიცხა

ლიეტუვის პრეზიდენტმა დალია გრიბაუსკაიტემ განაცხადა, რომ ქვეყანა უნდა იყოს მზად თავდასხმისთვის. ამის შესახებ გრიბაუსკაიტემ გერმანულ ჟურნალ Spiegel-ს უთხრა.

„თუ ჩვენ ვაჩვენებთ, რომ შეგვიძლია და გვინდა საკუთარი თავის დაცვა, მაშინ არავინ არ დაგვესხმება თავს. ჩვენ მზად უნდა ვიყოთ: ფსიქოლოგიურად, პოლიტიკურად, ტექნოლოგიურად, გულითა და სულით“, - განაცხადა პრეზიდენტმა.

ლიეტუვის პრეზიდენტის შეფასებით, რუსეთის ჩარევის საფრთხე დიდია, თუკი „მუდმივად არ დავიცავთ თავს“. მისივე თქმით, ბალტიისპირეთის ქვეყნებთან და პოლონეთთან მობილიზებული რუსული ჯარები ნატოს ჯარებზე უფრო ძლიერია.

ლიეტუვის პრეზიდენტმა აღნიშნა, რომ აქვს ლიეტუველი ახალგაზრდების იმედი, რომლებიც „ქვეყნის დასაცავად მზად არიან“. გრიბაუსკაიტეს თქმით, მოსახლეობამ დიდი შეცდომა დაუშვა 1940 წელს, როცა ვერ დაიცვა ქვეყანა საბჭოთა კავშირის წითელი არმიისგან, რაც ლიეტუვის ოკუპაციითა და გენოციდით დასრულდა. გრიბაუსკაიტეს განცხადებით, მაშინ ლიეტუვამ მოსახლეობის 15% დაკარგა, ხოლო მოსახლეობის დიდი ნაწილი გადაიყვანეს საბჭოთა ბანაკებში.

„უნდა გვებრძოლა. ამ შეცდომას აღარ დავუშვებთ“, -დასძინა ლიეტუვის პრეზიდენტმა.

მისი თქმით, დასავლეთი შესაბამისად ვერ აფასებს რუსეთს და მას ზედმეტად რბილად ექცევა.

„მხოლოდ მაშინ იღვიძებენ, როდესაც რუსეთი ერევა მათ ინტერესებში, ჯაშუშობს, ან მანიპულირებს მათი არჩევნებით“, - განაცხადა გრიბაუსკაიტემ.