მსოფლიო

კრემლი ცდილობს აფხაზური სცენარი გაითამაშოს დონბასში - პავლო კლიმკინი „მალარასიაზე“

უკრაინის საგარეო საქმეთა მინისტრი პავლო კლიმკინი ტვიტერის საკუთარ გვერდზე, უკრაინელი სეპარატისტების მიერ ახალი სახელმწიფოს „მალარასიის“ შექმნის შესახებ განცხადებას გამოეხმაურა.

კლიმკინის თქმით, კრემლი დონბასში აფხაზური სცენარის გამეორებას ცდილობს.

„მაშინ, როცა უკრაინული დელეგაცია იმყოფება თბილისში, კრემლი ცდილობს, აფხაზური სცენარი გაითამაშოს დონბასში. ჩვენ ჩვენს პარტნიორებთან ამას არ დავუშვებთ“, - დაწერა კლიმკინმა.

შეგახსენებთ, უკრაინის სეპარატისტული დონეცკის თვითგამოცხადებული რესპუბლიკის ლიდერმა, ალექსანდრ ზახარჩენკომ განაცხადა, რომ ლუგანსკის თვითგამოცხადებულ რესპუბლიკასთან გაერთიანებით შეიქმნა ახალი სახელმწიფო „მალარასია“. მისი თქმით, „მალარასია“ უკრაინის შემცვლელი სახელმწიფოა.