კომენტარი

ყოველთვის ვიქნებით შეურიგებელი ჩაწყობილი თამაშების ფაქტებთან მიმართებაში - მიხეილ გიორგაძე

კულტურის და სპორტის მინისტრის მიხეილ გიორგაძის თქმით, სახელმწიფო ყოველთვის იქნება შეურიგებელი ჩაწყობილი თამაშების ფაქტებთან მიმართებაში.

ამის შესახებ გიორგაძემ სუს-ის მიერ დაკავებული კალათბურთის მწვრთნელებისა და მსაჯების დაკავების ფაქტის კომენტირებისას განაცხადა.

„ვიცი ის, რომ დაკავებული არის ორი მწვრთნელი და ორი მსაჯი ჩაწყობილ თამაშებთან დაკავშირებით. დანარჩენ დეტალებს გავიგებთ მოგვიანებით. ყოველთვის ვიქნებით შეურიგებელი ასეთ ფაქტებთან მიმართებაში, თუმცა, როგორც იცით, ჩაწყობილი თამაშების პრობლემა არა მხოლოდ საქართველოში, არამედ მსოფლიოში არსებობს“, - განაცხადა გიორგაძემ.

სახელმწიფო უსაფრთხოების სამსახურმა სამი მსაჯი და ორი მწვრთნელი დააკავა, რაც უწყების ინფორმაციით, საკალათბურთო ჩემპიონატის „სუპერლიგის“ სამი მატჩის ჩაწყობას უკავშირდება.

სუს-ის განცხადებაში ნათქვამია,რომ მსაჯებმა და მწვრთნელებმა აღნიშნული თამაშების კონკრეტული შედეგებით დასრულების სანაცვლოდ ჯამში, 36 ათასი ლარი აიღეს.

„საქართველოს სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა,ჩატარებული ოპერატიულ-სამძებრო და საგამოძიებო მოქმედებების შედეგად, ჯგუფურად კომერციული მოსყიდვის ფაქტზე საერთაშორისო კატეგორიის მსაჯები -ზაზა მაჩალაძე, ირაკლი ბერიშვილი და დავით ბერიშვილი, ასევე საკალათბურთო კლუბ „სოხუმი“-ს მწვრთნელი ვაჟა კვარაცხელია და ამავე კლუბის თანამფლობელი - თემურ დათიკაშვილი დააკავეს“, - ნათქვამია უწყების განცხადებაში.

მონიკა დავლიანიძე