კომენტარი

ყოველდღიურად ინფორმაციის ღიად გაცემით, ჩვენ ცეცხლს ვეთამაშებით - დიმიტრი ხუნდაძე

საპარლამენტო უმრავლესობის წევრის, დიმიტრი ხუნდაძის განცხადებით, ბერ გაბრიელ სალოსის ქუჩაზე ჩატარებულ ანტიტერორისტულ ოპერაციასთან დაკავშირებით ყოველდღიურად ინფორმაციის გაცემით, საზოგადოება ცეცხლს ეთამაშება.

როგორც პარლამენტის პლენარულ სხდომაზე ხუნდაძემ აღნიშნა, ამ ინფორმაციას ბევრი დაინტერესებული მხარე მოიხმარს როგორც ქვეყნის შიგნით, ისე მის ფარგლებს გარეთ.

„ჩემი განცხადების ადრესატები არიან ის პოლიტიკოსები, საზოგადოების წარმომადგენლები და მათ შორის მედიაც, ვინც დეტალების გასაჯაროებას ითხოვს. რა თქმა უნდა, საზოგადოება ინფორმაციას უნდა ფლობდეს, თუმცა არ იმ დოზით, როგორითაც ითხოვენ.

ეს არის განსაკუთრებული შემთხვევა, რომელიც სახელმწიფო უსაფრთხოებასთან არის დაკავშირებული.

ვფიქრობ, ამ საკითხზე ყოველდღიურად ინფორმაციის ღიად გაცემით, ჩვენ ცეცხლს ვეთამაშებით. ამ ინფორმაციას მოიხმარს როგორც ქვეყნის შიგნით, ისე მის გარეთ ბევრი დაინტერესებული მხარე. თუ რომელიმე პოლიტიკოსს, მაინცდამაინც სურს ცეცხლთან თამაში შეუძლია ეს გააკეთოს საკუთარი და არა ქვეყნის მოსახლეობის უსაფრთხოების ფასად, ქვეყნის უსაფრთხოებას პოლიტიკური დივიდენდებისთვის ნუ გამოიყენებთ. ამ თემაზე შეგვიძლია მხოლოდ დახურულ ფორმატში ვისაუბროთ, გავთავისუფლდეთ ვიწროპარტიული ინტერესებისგან და ვიზრუნოთ სახელმწიფო უსაფრთხოებაზე, რომელიც თითოეული მოქალაქის სიცოცხლეზე გადის!“,-განაცხადა დიმიტრი ხუნდაძემ.

მონიკა დავლიანიძე