კომენტარი

კორუფციის მხრივ მძიმე ვითარებაა - გივი თარგამაძე

„ევროპული საქართველოს“ წევრმა გივი თარგამაძემ პროკურატურას მოუწოდა, რეაგირება მოახდინოს ფინანსთა სამინისტროს საგამოძიებო სამსახურში „არსებულ კორუფციულ გარიგებაზე “. მან ფინანსთა სამინისტროს საგამოძიებო სამსახურის ყოფილი თანამშრომლის ივანე აბესაძის საქმე მაგალითად მოიყვანა.

თარგამაძის თქმით, აბესაძე საგამოძიებო სამსახურიდან უსამართლოდ მხოლოდ იმის გამო გაათავისუფლეს, რომ სააფთიაქო სფეროში დანაშაულებებზე, ასევე რესპუბლიკურ საავადმყოფოში ფინანსურ დარღვევებზე საუბრობდა.

„ივანე აბესაძე გაუშვეს სამსახურიდან, როდესაც მან სააფთიაქო სფეროში დანაშაულებები ამხილა. თუმცა დღემდე პროკურატურაში არ არის გაცემული ამ კითხვებზე პასუხი. მიმდინარე პროცესებს თუ შევხედავთ, ჩვენ დავინახავთ, რომ კორუფციის მხრივ მძიმე ვითარებაა. ასევე ვხედავთ, რომ საგამოძიებო სამსახურის მაღალჩინოსნები ჩართულები არიან ამჟამად „იბერიას“ საქმეში.

მე მოვუწოდებ პროკურატურას, მოახდინოს რეაგირება ფინანსთა სამინისტროს საგამოძიებო სამსახურის ყოფილი თანამშრომლის განცხადებაზე და გასცეს ყველა კითხვას პასუხი“ , - განაცხადა თარგამაძემ.