კომენტარი

კონკრეტული რაღაცა რაოდენობა ადამიანებისთვის ოპტიმიზაციის პროცესი შეიძლება მტკივნეული იყოს - თამარ ჩუგოშვილი

პარლამენტის თავმჯდომარის პირველი მოადგილის, თამარ ჩუგოშვილის თქმით, ბუნებრივია, რომ სამინისტროების შემცირება იქ დასაქმებული ადამიანების გარკვეული რაოდენობისთვის მტკივნეული იქნება.

თუმცა, ჩუგოშვილის განმარტებით, სხვაგვარად ადმინისტრაციული ხარჯის შემცირება და მთავრობის ეფექტიანობის გაზრდა ვერ მოხერხდება.

ვიცე-სპიკერმა ოპოზიციის ბრალდებასაც უპასუხა, რომელიც თვლის, რომ შინაგან საქმეთა მინისტრად გიორგი გახარაიას კანდიდატურის წარდგენით, ბიძინა ივანიშვილი ცდილობს „უფრო ახლო დისტანციიდან გააკონტროლოს საკვანძო უწყება“.

ჩუგოშვილის თქმით, ამ კონტექსტში ოპოზიციის დაუსრულებელი ბრალდებები მოსახლეობას მობეზრდა.
„ეს ცვლილებები არის აუცილებელი იმისთვის, რომ მთავრობის საქმიანობა იყოს ბევრად უფრო ეფექტური, უკეთ კოორდინირებული და იყოს მინიმალური რესურსების გამოყენების ხარჯზე.

მე მგონი, საუბარი ბიძინა ივანიშვილზე, დაუსრულებელი საუბარი მის მონაწილეობაზე ამ ყველაფერში, რა კონტექსტშიც ამას აკეთებს ოპოზიცია, მე მგონი უკვე მობეზრდა მოსახლეობას და არ ვაპირებ ამაზე კომენტარები ვაკეთო.

ბუნებრივია, რომ კონკრეტული რაღაცა რაოდენობა ადამიანებისთვის, შეიძლება ეს მტკივნეული იყოს. მე მესმის ეს ყველაფერი, მაგრამ მეორეს მხრივ, ჩვენ როდესაც ვსაუბრობთ ბიუროკრატიის შემცირებაზე და ადმინისტრაციული ხარჯების შემცირებაზე, სხვანაირად ამ ხარჯების შემცირება ვერ მოხდება და მთავრობის ეფექტიანობის გაზრდა ვერ მოხდება“,-განმარტა ჩუგოშვილმა.

მონიკა დავლიანიძე