კომენტარი

კომისიის მუშაობის პროცესში ჩვენ დავადგინეთ, რომ გამოძიების მიმდინარეობის ფარგლებში კომუნიკაციის პრობლემა იყო - არჩილ თალაკვაძე

საპარლამენტო უმრავლესობის ლიდერის, არჩილ თალაკვაძის თქმით, ხორავას ქუჩაზე მოზარდების მკვლელობის საქმეზე შექმნილი საგამოძიებო კომისიის საპარლამენტო უმრავლესობის წევრთა მიერ მომზადებულ დასკვნაში მითითებულია ის ხარვეზები, რაც გამოძიების პროცესში გავლენა იქონია მტკიცებულებათა ხარისხზე.

თალაკვაძემ აღნიშნა, რომ საპარლამენტო უმრავლესობის წევრთა დასკვნაში წერია, რომ პოლიტიკური ან უწყებრივი ჩარევა მართლმსაჯულების წინააღმდეგ არ მომხდარა.

„ასევე დასკვნაში არის კონკრეტული, მკაცრი რეკომენდაციები, რომელთა შესრულებასაც ჩვენ ვითხოვთ, რათა აღმოიფხვრას გამოძიების შედეგად დადგენილი ხარვეზები. მნიშვნელოვანია, რომ კომისიის მუშაობის პროცესში ჩვენ დავადგინეთ, რომ გამოძიების მიმდინარეობის ფარგლებში კომუნიკაციის პრობლემა იყო, როგორც დაზარალებულ მხარესთან, ისე – საზოგადოებასთან. ჩვენ ამ დასკვნას კომისიის სხდომაზე წარვადგენთ და შემდეგ პლენარულ სხდომას განსახილველად გადაეგზავნება“, -თქვა დეპუტატმა.

ხორავას ქუჩაზე დანაშაულის შედეგად ორი ახალგაზრდის მკვლელობის ფაქტის შემსწავლელი საქართველოს პარლამენტის დროებითი საგამოძიებო კომისიის შემადგენლობაში არიან „ევროპული საქართველოს“ წევრები, საპარლამენტო უმრავლესობის წევრები და დამოუკიდებელი დეპუტატი სალომე ზურაბიშვილი.

საგამოძიებო კომისიის წევრებმა „ევროპული საქართველოდან“ და საპარლამენტო უმრავლესობიდან ერთმანეთისგან დამოუკიდებელი დასკვნები მოამზადეს.