მსოფლიო

ყოფილ ბანკირს, რომელსაც ბიძინა ივანიშვილი ედავებოდა, 5-წლიანი პატიმრობა მიუსაჯეს

ჟენევის სასამართლომ დამნაშავედ ცნო Credit Suisse Group AG-ის ყოფილი ბანკირი პატრის ლესკადრონი, რომელსაც ბრალად ედებოდა ფინანსური მაქინაციები, რომლის შედეგად მისი კლიენტებს 143 მილიონი შვეიცარიული ფრანკის (152 მილიონი დოლარის) ზარალი მიადგათ. 6 დაზარალებულს შორის აღმოჩნდა საქართველოს ყოფილი პრემიერ-მინისტრი ბიძინა ივანიშვილი.

ლესკადრონს სასამართლომ 5-წლიანი პატიმრობა მიუსაჯა. აღნიშნული საქმის განხილვა 2 კვირის განმავლობაში მიმდინარეობდა.

ბრალდებული უარყოფდა რამე სარგებლის მიღებას უკანონო გარიგებებიდან, თუმცა მოსამაართლე ალექსანდრა ბანას მტკიცებით, ლესკადრონმა მაქინაციების შედეგად 30 მილიონი ფრანკი მიისაკუთრა.

Credit Suisse Group AG-ის ყოფილი ბანკირი 2015 წლის იანვარში დააკავეს მას შემდეგ, რაც პროკურორებმა დაიწყეს იმის გამოძიება, თუ როგორ აწარმოებდა ის უკანონო შესყიდვებს და აყალბებდა დოკუმენტაციას, რათა დაემალა მისი კლიენტების დანაკარგები.

სასამართლომ ლესკადრონს 130 მილიონი შვეიცარიული ფრანკის ოდენობით ზიანის ანაზღაურება და კლიენტებისთვის კომპენსაციის სახით 22 მილიონი შვეიცარიული ფრანკის გადახდა დააკისრა.